Ýnıversıtet rektory Azamat Tirijanuly Edrısov bilim ordasynyń búgingi betalysyna keńinen toqtaldy: «Biz halyqaralyq standarttarǵa saı bilim berý júıesin jańǵyrtyp, sapalyq deńgeıdi arttyrý arqyly álemdik bilim keńistigine ene alamyz. Osy oraıda oqý ornynda sanǵa emes, sapaǵa jumys isteý máselesi qolǵa alyndy. Basty meje – bilim, ǵylym, óndiris, ınnovasııany ushtastyra otyryp, ınvestısııa quıý, osy arqyly memleketimizdiń halyqaralyq qoǵamdastyqtaǵy bedelin bekemdeı túsý.
Joǵary oqý orny maıtalman maman, naǵyz ǵylym adamdaryn daıarlaıtyn orta. Osy turǵyda ǵylymı kadrlar sabaqtastyǵyn qamtamasyz ete otyryp, professorlyq-oqytýshylar quramynyń ǵylymı áleýetin arttyryp, talantty jastardy ǵylymǵa tartyp, magıstratýraǵa, doktorantýraǵa túsýine yqpal etip, jaǵdaı jasaý qajet. «PhD dárejesi ataq, abyroı, kúnkóris kózi úshin kerek» degen jalań túsinikti joqqa shyǵaratyn kez jetti. Doktorantýra – joǵary bilikti ǵylymı-pedagogıkalyq, ǵylymı kadrlardy daıyndaý nysany, al oǵan túsýdegi basty baǵdar – ǵylymdy damytý ekendigin eskere otyryp, úmitkerler bul qadamǵa sanaly túrde barsa, túıtkildi biraz másele oń sheshim tabar edi. Bilim alýshylarymyz ǵylymǵa den qoıyp, doktorantýramyz álemdik deńgeıde tynystaǵanda ǵana Qazaqstan ǵylymy alǵa basady. Aǵymdaǵy jyly elimizde magıstratýra men doktorantýraǵa túsý erejesine birshama ózgerister engizildi. Bıyldan bastap IELTS, TOEFL syndy synaqtardy sátti tapsyryp, sertıfıkat ıelengender ǵana doktorantýraǵa joldama alatyn bolady. Al bizdiń oqytýshylarymyz mundaı ózgeriske daıyn ba? Qandaı ońtaıly sheshim jasaý arqyly ǵylymǵa umtylǵan oqytýshylarymyzǵa qoldaý tanyta alamyz? Qazir osy oraıda sheshimin tappaǵan máselelerdi sheshý joldary qarastyrylýda. Jaqynda aǵylshyn tilin bilý deńgeıin anyqtaý maqsatynda oqytýshylarymyz test tapsyrdy. Álemniń, ǵylym men aqparattyń tilin bilmeı doktorant ataný múmkin emes. Osy olqylyqty joıý maqsatynda doktorantýraǵa túsýdi nıet etken talapkerlerge qoldaý kórsetilip, ýnıversıtet tarapynan úsh aılyq aǵylshynsha kýrsty tegin oqytý qolǵa alyndy. Bul izgi bastama úmitkerlerdi qanattandyrdy. Ǵylym doktory dárejesin ıelengen doktoranttarymyzdyń ǵylymı-zertteý jumystary el kádesine jarap, otandyq ǵylymnyń damýyna oń yqpal etse, biz kútken úmit aqtalady. Memlekettik bilim berý tapsyrysy boıynsha, ýnıversıtet tarapynan bólinetin qomaqty qarjy qumǵa sińgen sýdaı jutylyp ketpese eken. Álemdik ǵylym naryǵynda úmitkerlerimiz básekege túse ala ma degen suraq bizdi qaı kezde de tolǵandyrýy tıis. Ǵalymdardyń jas býynyn daıarlaý, ýnıversıtet kadrlyq quramyn sapaly túrde jańartyp otyrý – basty maqsatymyz. Bilim men ǵylym ústemdik qurǵan zamanda QarMÝ qoldaý tanytyp, qanattandyrǵan jas doktorlar akademııalyq qoǵamdastyqtyń dástúrlerin, qundylyqtaryn, umtylystary men maqsat-mindetterin tolyqqandy bólisetin akademııalyq ujymymyzdyń tabysty, belsendi múshelerine aınalady dep úmittenemiz».
Atalǵan kýrsqa qatysty QarMÝ oqytýshylary da óz pikirlerin bildirdi.
Svetlana Mýsına, ekonomıka fakýltetiniń aǵa oqytýshysy:
– Aıtýly kýrs bilim ordasy tarapynan mamandarymyzǵa kórsetilgen úlken qoldaý dep bilemin. Oqý orny aǵylshyn tilin qanshalyqty meńgergenimizdi synap kórý múmkindigin týǵyzyp otyr. Aqyly túrde osyndaı kýrstarǵa baryp júrgen talapkerlerimiz endi aqshasyn únemdep, oqý orny usynǵan ıntensıvti kýrsqa tegin bara alady. Kýrsqa qatysý arqyly ózime degen senimim artty, armanyma bir qadam jaqyndaǵandaımyn. Moraldyq turǵydan qoldaý tanytyp, kásibı turǵydan shyńdalýyma yqpal etken ýnıversıtet basshylyǵyna aıtar alǵysym sheksiz.
Samat Jakın, fılosofııa jáne psıhologııa fakýltetiniń oqytýshysy:
– Men bakalavrıat, magıstratýrada oqyp júrgen kezden aǵylshyn tilin úırenip, IELTS tapsyrýǵa daıyndaldym. Atalǵan synaq búgingi kúnniń talaby, tabysty ǵylymı-pedagogıkalyq mansapqa bastaıtyn alǵysharttardyń biri. Oqý orny ishinen tegin úsh aılyq kýrstyń uıymdastyrylýy maqtanarlyq, quptarlyq is. Ýnıversıtettiń kadrlyq áleýetin damytatyn ıntensıvti kýrstar uzaq merzimdi tereńdetip oqytýǵa arnalǵan IELTS emtıhanyna daıyndalýǵa baǵyttalǵan. Joǵary deńgeıdegi oqytý úrdisine qatysyp, tájirıbeli mamandardyń keńesin tyńdaý – bul bizge berilgen biregeı tamasha múmkindik.
P.S.: Qazaq ǵylymynyń kóshbasshysy Qanysh Sátbaev bir sózinde: «О́z bilimin ómirdiń, óndiristiń tájirıbelerimen nyǵaıtyp, baıytyp otyratyn, tapqan ilimin, úlkendi-kishili ashqan jańalyǵyn halyqtyń qajetine berip otyratyn ǵylym ǵana óz dárejesinde zaman talabynyń óresinde bolady», depti. Úmit etken úmitkerlerimiz sol údeden shyǵyp, otandyq ǵylymnyń damýyna ózindik úles qossa, nur ústine nur bolar edi.
Gúlnár ShО́MENOVA