Almaty ákimi Baýyrjan Baıbek Áýezov aýdany «Taýgúl-3» yqsham aýdanyndaǵy №175 gımnazııada ótken sońǵy qońyraý saltanatty rásimine qatysyp, mektep bitirýshi túlekter, ustazdar men ata-analardy oqý jylynyń aıaqtalýymen quttyqtap, álemniń eń ozyq 30 eliniń kóshine ilesý úshin jańa bilimdi meńgerip, jańa maqsattarǵa jetý kerektigin aıtty. Sondaı-aq qala ákimi sońǵy úsh jyl ishinde 3 jańa qazaq mektebiniń ashylǵanyn, onyń ekeýiniń jeke ınvestorlarmen áriptestik yntymaqtastyq barysynda salynǵanyn atap ótti.
Aldaǵy oqý jylynda Alataý aýdanynda taǵy bir qazaq mektebi ashylatyn bolady. Eki qazaq mektebi janynan 400 jáne 900 oryndy qosalqy nysandar iske qosylady. Taıaý ýaqytta 7900 oryndy taǵy 8 jańa mektep salý josparlanǵan.
«Qazirgi kezde qalada zamanaýı sapaly bilim alý úshin barlyq jaǵdaı jasalǵan. Elbasy únemi XXI ǵasyr – bilim men ǵylym ǵasyry dep aıtyp keledi. Tek bilimdi ári bilikti kadrlardy ósirgende ǵana biz qýatty jáne gúldengen memleketke aınalamyz. Bıylǵy 236 myń oqýshynyń 98,7%-i mektep janyndaǵy jáne qala syrtyndaǵy 800-ge jýyq lagerge baratyn bolady, oǵan jergilikti bıýdjet esebinen 232,4 mln teńge qarjy qarastyryldy. Qalǵan balalar túrli úıirme jáne klýbtarǵa, sporttyq seksııalarǵa qamtylady. Memleket jáne qala ákimdigi tarapynan balalardyń áleýmettik jaǵdaıyna da erekshe mán berilgen. Bıylǵy oqý jylynda qala mektepterinde úzdik oqıtyn, kópbalaly otbasynan shyqqan 2614 oqýshy jergilikti bıýdjet esebinen stıpendııa aldy», - dep atap ótti Baýyrjan Baıbek.