Jıynǵa Qazaqstan Respýblıkasynyń Tuńǵysh Prezıdenti – Elbasy N.Nazarbaev, Belarýs Respýblıkasynyń Prezıdenti A.Lýkashenko, Qyrǵyz Respýblıkasynyń Prezıdenti S.Jeenbekov, Reseı Federasııasynyń Prezıdenti V.Pýtın, Moldova Respýblıkasynyń Prezıdenti I.Dodon, Tájikstan Respýblıkasynyń Prezıdenti E.Rahmon, Armenııa Respýblıkasynyń Premer-Mınıstri N.Pashınıan, Eýrazııalyq ekonomıkalyq komıssııa alqasynyń tóraǵasy T.Sarkısıan, TMD atqarý komıtetiniń tóraǵasy – atqarýshy hatshysy S.Lebedev qatysty.
Memleket basshysy Eýrazııalyq ekonomıkalyq odaqtyń qysqa merzim ishinde halyqaralyq arenada mańyzdy ári tanymal uıymǵa aınalǵanyn atap ótip, eýrazııalyq ıntegrasııa belgili bir qıyndyqtarǵa qaramastan jaqsy nátıje berip otyrǵanyn aıtty.
– О́tken jyly Eýrazııalyq ekonomıkalyq odaqqa múshe memleketterdiń ishki jalpy óniminiń ósimi 2,5 paıyz boldy. Syrtqy saýda kólemi 19 paıyzǵa, eksport 27 paıyzǵa artty. Odaq ishindegi ózara saýda-sattyq 9 paıyzǵa ulǵaıdy. Byltyr Qazaqstan ekonomıkasy 4 paıyzdan astam ósti, – dedi Qasym-Jomart Toqaev.
Qazaqstan Prezıdenti osy ósim qarqynyn qoldaý úshin ónerkásipte, energetıkada, halyqaralyq qyzmette jáne basqa da salalarda orta merzimdi damý perspektıvasynyń negizgi baǵyttary aıqyndalǵanyn aıtty.
– Eýrazııalyq ekonomıkalyq odaqtyń Kedendik kodeksi qabyldandy. Qyzmet kórsetý jáne jumys kúshiniń ortaq naryǵy qurylýda. Ulttyq rettegishten joǵary kelisimder aıasyndaǵy ákimshilik rásimder jetildirilýde. Álemniń 40-tan astam eli Eýrazııalyq ekonomıkalyq odaqpen saýda-ekonomıkalyq yntymaqtastyqty damytýǵa nıet bildirdi. Bizdiń birlesken jumysymyz álemniń kóptegen elderiniń qyzyǵýshylyǵyn týǵyzatynyna jáne keleshekte iri ári ekonomıkalyq qýatty Eýrazııa qurýǵa múmkindik beretinine senimdimin, – dedi Memleket basshysy.
Qasym-Jomart Toqaev aldaǵy ýaqytta ıntegrasııalyq birlestiktiń aldynda turǵan mańyzdy mindetterdi atap ótti. Onyń pikirinshe Eýrazııalyq ekonomıkalyq odaqtyń ınfraqurylymdyq megajobalaryn jáne sıfrlyq kún tártibin júzege asyrý kerek. «Astana» halyqaralyq qarjy ortalyǵynyń da áleýetin paıdalaný qajet. Sonymen qatar, alda ortaq naryqty damytyp, ony úshinshi elder tarapynan bolatyn dempıngten, kontrafaktilik taýarlardan jáne las básekeden qorǵaý, tıimdi kedendik ákimshilendirýdi qamtamasyz etý jumystary turǵanyn aıtty.
– Nursultan Ábishuly Nazarbaev jedel temir jol jáne «Eýrazııa» sý arnasyn salýdy usyndy. Bul jobalar eýrazııalyq ıntegrasııanyń sımvoly bolyp, elderimizdiń ekonomıkasynyń damýyna tyń serpin berip, Úlken Eýrazııamen baılanysty nyǵaıtar edi. Nátıjesinde memleketterimiz Shyǵys-Batys-Shyǵys tranzıti úshin básekege qabiletti ári tartymdyraq bolady, – dedi Qazaqstan Prezıdenti.
Sonymen qatar, Memleket basshysy taýarlardyń jańa naryqqa shyǵýyn qamtamasyz etýge, saýdadaǵy jáne tranzıttegi kedergilerdi joıýǵa birlesip kúsh baǵyttaý kerek ekenin aıtty.
Qazaqstan Prezıdenti sóziniń sońynda jıyn qorytyndysy tabysty yntymaqtastyqtyń irgesin bekitip, Eýrazııalyq ekonomıkalyq odaqqa múshe elderdiń seriktestigin nyǵaıtatynyna senim bildirdi.
* * *
Joǵary Eýrazııalyq ekonomıkalyq keńes sammıtiniń qorytyndysy boıynsha mynadaı qujattar qabyldanyp, qol qoıyldy:
1. Joǵary keńestiń «Joǵary Eýrazııalyq ekonomıkalyq keńestiń Qurmetti Tóraǵasy týraly» sheshimi;
2. Joǵary keńestiń «Qytaı Halyq Respýblıkasy men Eýrazııalyq ekonomıkalyq odaqtyń kedendik shekaralary arqyly ótetin taýarlar men halyqaralyq júk tasymalynyń kólik quraldary jóninde, aqparat almasý jónindegi kelisimderge qol qoıý máseleleri týraly» sheshimi;
3. Joǵary keńestiń «Bir jaǵy – Eýrazııalyq ekonomıkalyq odaq jáne oǵan múshe-memleketter, ekinshi jaǵy – Serbııa Respýblıkasy arasyndaǵy erkin saýda aımaǵy jónindegi kelisimderge qol qoıý máseleleri týraly» sheshimi;
4. Joǵary keńestiń «Eýrazııa ekonomıkalyq odaqqa múshe-memleketterdiń 2019-2020 jyldarǵa arnalǵan negizgi makroekonomıkalyq saıasatynyń negizgi baǵdarlary týraly» sheshimi;
5. Joǵary keńestiń «Eýrazııalyq ekonomıkalyq odaqtyń ónerkásiptik saıasaty jónindegi keńes týraly» sheshimi;
6. Joǵary keńestiń «Eýrazııalyq ekonomıkalyq odaqtyń damýyna qosqan úlesi úshin» medalimen marapattaý týraly» sheshimi;
7. Joǵary keńestiń «2017-2018 jyldardaǵy múshe-memleketterdiń saýda, kórsetetin qyzmetteri, mekemeler men jumystaryn retteý tártibimen qarastyrylǵan Erejeniń oryndalý monıtorınginiń nátıjeleri týraly» ókimi;
8. Joǵary keńestiń «Eýrazııalyq ekonomıkalyq odaq aıasyndaǵy kórsetiletin qyzmetterdiń jekelegen sektorlary boıynsha lıberalızasııalaý josparlaryn júzege asyrýdyń keıbir máseleleri týraly» ókimi;
9. Joǵary keńestiń «Tabıǵı monopolııalar sýbektileriniń qyzmetin retteýdiń biryńǵaı qaǵıdattary men erejeleri týraly hattamanyń 20-tarmaǵy, 5-tarmaqshasyna sáıkes aqparat usyný týraly» ókimi;
10. Joǵary keńestiń «Transshekaralyq naryqtardaǵy básekelestik ahýal jáne 2018 jylǵy básekelestiktiń jalpy tártibi buzylýynyń aldyn alý jóninde qabyldanǵan sharalar Eýrazııalyq ekonomıkalyq komıssııanyń jyldyq esebi týraly» ókimi;
11. Joǵary keńestiń «Joǵary Eýrazııalyq ekonomıkalyq keńestiń kezekti otyrysyn ótkizilý ýaqyty men orny týraly» ókimi;
12. 2014 jyldyń 29 mamyryndaǵy Eýrazııalyq ekonomıkalyq odaq týraly kelisimge ózgerister engizý týraly hattama;
13. Eýrazııalyq ekonomıkalyq odaqqa múshe-memleketterdiń bıýdjetteri arasynda kedendik baj salyǵynyń kiris somasyn bólý týraly hattama;
14. Eýrazııalyq ekonomıkalyq odaq qurý týraly kelisimge qol qoıylýynyń 5 jyldyǵyna oraı, Joǵary Eýrazııalyq ekonomıkalyq keńes músheleriniń birlesken málimdemesi;
15. 2014 jyldyń 29 mamyryndaǵy Eýrazııalyq ekonomıkalyq odaq týraly kelisimge ózgerister engizý jónindegi hattamalarǵa qol qoıý týraly;
16. 2017 jyldyń 11 sáýirindegi Eýrazııalyq ekonomıkalyq odaqtyń Kedendik kodeksi jónindegi Kelisimge ózgerister engizý týraly hattama;
17. Eýrazııalyq ekonomıkalyq odaqtyń kedendik aýmaǵyna enetin taýarlardy baqylaý mehanızmderi týraly kelisim;
18. 2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy Eýrazııalyq ekonomıkalyq odaq týraly shartty, Eýrazııalyq ekonomıkalyq odaqtyń quqyǵyna kiretin jekelegen halyqaralyq sharttardy jáne Eýrazııalyq ekonomıkalyq odaq organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrda qol qoıylǵan hattamaǵa ózgeris engizý hattama.