Aýyl sharýashylyǵy mınıstri Aral aýdanynda balyq óńdeý zaýytynyń jumysymen tanysty. Bul kásiporynda jylyna 6 myń tonna ónim óndiriledi. Zaýytta 60 adam, al maýsymynda 100-ge jýyq adam jumys isteıdi. Zaýyttyń ónimderi Reseı, Qytaı, О́zbekstan, Polsha, Grýzııa, Ázirbaıjan, Gollandııa, Germanııa jáne Danııaǵa eksporttalady.
Sonymen qatar, mınıstr Qazaly aýdanyndaǵy táýligine 30 myń tonna sút óndiretin «RZA» AQ sút-taýar kesheni men sút zaýytynyń jumysyn kórdi. Zaýyt ónimderi Qyzylorda, Mańǵystaý, Atyraý, Aqtóbe jáne Batys Qazaqstan oblystarynda satylady.
Sodan soń mınıstr Qarmaqshy aýdanynda Qorqyt Ata memorıaldyq keshenine baryp, mýzeıdiń jańartylǵan eksponattarymen tanysty. Sapar barysynda QR Aýyl sharýashylyǵy mınıstri 1956 jyly salynǵan Qyzylorda sý torabyna bardy.
Shıeli aýdanynda Saparhan Omarov Jańaqorǵan jáne Shıeli aýdandaryn sýarmaly sýmen qamtamasyz etý maqsatynda 2015 jyly salynǵan úrlemeli bógetti aralap kórdi. Esterińizge sala keteıik, Jańaqorǵan jáne Shıeli aýdandaryndaǵy úrlemeli bógetter qurylysynyń arqasynda óńir ońtústik aýdandarda paıdalanylmaıtyn 60 myń gektar egistik jáne jaıylymdyq jerlerdi ıgerýge múmkindik aldy.
QR Aýyl sharýashylyǵy mınıstriniń jumys sapary qarjy ınstıtýttary basshylarynyń, mal sharýashylyǵy boıynsha ǵylymı-zertteý ınstıtýttarynyń jetekshi ǵalymdarynyń jáne Qazaqstannyń alty oblysynan kelgen delegattar qatysqan dástúrli malshylar sletimen qorytyndylandy.
Qyzylorda oblysy