Irikteý kezeńiniń úshinshi jáne tórtinshi týr aıasynda Qazaqstan quramasy reıtıng boıynsha álemniń eń úzdik jáne eń nashar komandasymen jolyǵady. Jerlesterimiz úshin syrt alańdaǵy oıyn mańyzdy bolmaq. О́ıtkeni ulttyq qurama Eden Azar bastaǵan álemiń eń úzdik fýtbolshylaryna qarsy oınaıdy. Dál qazirgi ýaqytta Belgııa FIFA reıtınginde kósh bastap tur. Jalpy, 2018 jylǵy álem chempıonatynyń qola júldegeri atanǵan quramany tanystyrýdyń ózi artyq.
Belgııa quramasy qazaqstandyq fýtbolshylarǵa jaqsy tanys. О́ıtkeni eki qurama osymen úshinshi ret Eýropa chempıonatynyń irikteý kezeńinde bir topta synǵa túsýde. Eń alǵash 2008 jylǵy Eýropa chempıonatynyń jáne 2012 jylǵy birinshiliktiń irikteý kezeńinde «A» tobynda oınaǵan. Bul joly «I» tobynda joldama úshin talasýda. Jalpy, eki qurama búginge deıin tórt ret kezdesken. Eki oıynda teń nátıje tirkelse, eki matchta Belgııa fýtbolshylary jeńis toıyn toılady.
Eki quramanyń alǵashqy tanystyǵy sonaý 2006 jyly Brıýsselde bastalǵan. Tuńǵysh ret kezdesken qos qurama bir-biriniń qaqpasyna sańylaý taba almaı, teń nátıjege rıza bolyp tarqasqan edi. Kelesi jyly Almatynyń Ortalyq stadıonynda ótken qarymta kezdesýde de 2:2 esebimen teń tústi. Oıyndaǵy esepti alǵash bolyp 12-mınýtta Belgııa fýtbolshysy Karel Gererts ashqan bolatyn. Araǵa 12-mınýt salyp Kevın Mıralıas esepti 2:0-ge jetkizdi. Birinshi taım aıaqtalar tusta Qazaqstan quramasynan Dmıtrıı Bıakov esepti qysqartýǵa múmkindik aldy. Ekinshi taımnyń 75-mınýtynda Samat Smaqov penaltıden esepti teńestirip, Qazaqstan quramasyna mańyzdy bir upaı syılaǵan edi.
Araǵa úsh jyl salyp eki komandanyń joly 2012 jylǵy Eýro dodasynyń irikteý jarysynda qaıta túıisti. Alǵashqy oıyn 2010 jyly qazanda Astanada ótti. «Astana Arenadaǵy» matchta qonaqtar qaqpamyzǵa jaýapsyz eki gol soǵyp, Belgııaǵa mańyzdy úsh upaımen oralǵan edi. Oıyndaǵy eki goldy da Marvın Ogýnjımı soqqan bolatyn. Kezdesýdiń 68-mınýtynda qorǵaýshy Aleksandr Kıslısyn qyzyl qaǵaz alyp, Qazaqstan quramasyn qıyn jaǵdaıda qaldyryp ketkenin de aıta keteıik. 2011 jyldyń qazan aıynda Belgııada ótken qarymta kezdesýde alań ıeleri 4:1 esebimen jeńiske jetti. Tórt goldyń qarymtasy retinde Qazaqstan quramasy sapynan jalǵyz jubanysh golyn Qaırat Nurdáýletov soqty. Ázirshe eki qurama arasyndaǵy teketireste Belgııanyń asyǵy alshysynan túsip tur.
Belgııa álem chempıonatynan keıin segiz ret jasyl alańǵa shyǵyp, alty oıynda jeńiske jetken. Bir kezdesýde teń tússe, bir matchta jeńiliske ushyraǵan. Segiz kezdesýde qarsylastar qaqpasyna 19 gol soǵyp, óz qaqpasyna segiz gol ótkizip alǵan. Belgııa quramasynyń qazirgi jaǵdaıy osyndaı.
Bılektiń tańdaýy
Qazaqstan quramasynyń bas bapkeri Mıhal Bılek aldaǵy eki oıynda el namysyn qorǵaıtyn fýtbolshylarymyzdyń tizimin jarııalady. Chehııalyq maman ótken oıyndarǵa qaraǵanda bul quramdy birshama jańartypty. Quramanyń jańarýy da zańdylyq edi. О́ıtkeni Bılek myrza jyl basynda bas bapker bolyp taǵaıyndalǵanda qazaqstandyq fýtbolshylardy tanymaıtyn jáne ol buǵan deıin Stoılov quryp bergen tizimdi shaqyrýǵa májbúr boldy. Al qazir Qazaqstan chempıonatyndaǵy birneshe oıynǵa arnaıy baryp, ózine qajet fýtbolshyny jiti qadaǵalap, kózge túsip júrgenderin ulttyq quramaǵa shaqyra bastady. Mysaly, «Qaısar» klýbynyń qorǵaýshysy Aleksandr Marochkın men jartylaı qorǵaýshy Ashat Taǵybergen, «Jetisý» komandasynyń qorǵaýshysy Oljas Kerimjanov bar. Sondaı-aq ulttyq quramanyń eń kóp synǵa ushyraıtyn shabýyl syzyǵyna Bılek myrza eki birdeı jańa fýtbolshyny shaqyrypty. О́tkende ǵana «Astana» klýbyna soqqan goly arqyly birqatar fýtbol mamandarynyń kózine túsken «Ordabasynyń» shabýylshysy Toqtar Jańǵylyshbaı men «Aqtóbeniń» jas shabýylshysy Abat Aıymbetovti de aldaǵy oıynǵa shaqyrǵan.
Mıhal Bılektiń bul jolǵy tizimine qorǵaýshy Evgenıı Postnıkov, jartylaı qorǵaýshy Serikjan Mujyqov jáne shabýylshylar Roman Murtazaev, Alekseı Shetkın, Erkebulan Seıdahmet sekildi fýtbolshylar enbeı qaldy. Postnıkov ulttyq quramadaǵy karerasyn aıaqtasa, Seıdahmet 21 jasqa deıingi Qazaqstan quramasyna shaqyrtý alǵan.
Belgııa jáne San-Marınomen ótetin oıyndarǵa shaqyrylǵan 24 fýtbolshynyń tizimi mynadaı:
Qaqpashylar: Stas Pokatılov («Qaırat»), Dmıtro Nepogodov («Ordabasy»), Igor Shaskıı («Shahter»);
Qorǵaýshylar: Abzal Beısebekov, Iýrıı Logvınenko, Dmıtrıı Shomko (barlyǵy – «Astana»), Ǵafýrjan Súıimbaev, Iаn Vorogovskıı (ekeýi de – «Qaırat»), Aleksandr Marochkın («Qaısar»), Temirlan Erlanov, Sergeı Malyı (ekeýi de – «Ordabasy»), Oljas Kerimjanov («Jetisý»);
Jartylaı qorǵaýshylar: Iýrıı Persýh («Astana»), Baýyrjan Islamhan, Islambek Kýat, Georgıı Jýkov (barlyǵy – «Qaırat»), Ashat Taǵybergen («Qaısar»), Aleksandr Merkel («Herakles», Gollandııa), Maksım Fedın, Azat Nurǵalıev (ekeýi de – «Tobyl»), Baktıer Zaınýtdınov («Rostov», Reseı);
Shabýylshylar: Baýyrjan Turysbek («Tobyl»), Abat Aıymbetov («Aqtóbe»), Toqtar Jańǵylyshbaı («Ordabasy»).