Parlament Senatynyń plenarlyq otyrysy bastalmas buryn Nursultan Nazarbaevqa «Qurmetti senator» mártebesin berý rásimi ótkizildi.
Elbasy barlyq depýtattarǵa qoldaý kórsetkeni jáne eńbegin joǵary baǵalaǵany úshin alǵys aıtty.
– Kópshiligińizben sońǵy 30 jyl boıy birge jumys istep kelemiz. Biz kóptegen qıyndyqty birge ótkerdik. Maǵan «Qurmetti senator» mártebesin berý týraly sheshim qabyldaǵandaryńyz úshin shynaıy rızashylyǵymdy bildiremin, – dedi Nursultan Nazarbaev.
Qazaqstannyń Tuńǵysh Prezıdenti qolǵa alǵan reformalardy tıimdi júzege asyrý isinde Parlamenttiń sapaly zań shyǵarý qyzmetiniń mańyzdy ekenin erekshe atap ótti.
– Elimiz búkil álemge tanymal boldy. Ekonomıkamyz damyp, azamattarymyzdyń turmys deńgeıi artty. Biz memleketti jańǵyrtýǵa baǵyttalǵan birneshe baǵdarlama qabyldadyq. Sizder sol qujattardy júzege asyrýǵa belsene atsalysyp kelesizder. Reformalardyń tabysty bolýy sizderdiń jumystaryńyzǵa baılanysty, – dedi Elbasy.
Nursultan Nazarbaev qoǵamnyń turaqtylyǵyn nyǵaıtý jáne damýdyń strategııalyq baǵdarynyń sabaqtastyǵyn qamtamasyz etý úshin prezıdenttik ókilettigin toqtatý týraly sheshim qabyldaǵanyn aıtty.
– Bizdiń basty jetistigimiz – eldegi turaqtylyq pen tynyshtyq. Álemdik qoǵamdastyqtyń qabyldaǵan sheshimime bildirgen pikirine tań qaldym. Biz búkil álemge bılik tranzıtine qatysty máseleni qalaı sheshýge bolatynyn kórsettik, – dedi Elbasy.
Sońynda Nursultan Nazarbaev táýelsiz Qazaqstandy odan ári damytý jáne órkendetý isinde jastardyń mańyzdy ról atqaratynyn atap ótti.