Aıta ketý kerek, bul úılerdi «Astana Motors» kompanııasy óz esebinen jóndep, aýlasyn abattandyryp, kópbalaly jáne kómekke muqtaj otbasylaryna syıǵa tartty.
– Aqadyr – meniń kishi otanym. Bul jerde meniń ákem balalyq shaǵyn ótkizgen. Bul ólke meniń ata-babalarym úshin ystyq bolǵan meken. Tabysqa jetken kez kelgen adam óziniń otany aldyndaǵy qaryzyn qaıtarýy tıis. Men búgin óz jerlesterime kómektese alǵanym úshin qýanyshtymyn. Bizdiń kompanııa qaıyrymdylyqpen belsendi túrde aınalysady, turǵyndarǵa kómektesedi. Bul bizdiń tujyrymdamamyz, bizdiń ómir saltymyz jáne bizdiń fılosofııamyz, – dedi kásipker Nurlan Smaǵulov.
Kópbalaly otbasylaryna buıyrǵan baspananyń bári de jıhazben jabdyqtalǵan, aýlasy abattandyrylǵan. Ár úıdiń janynda jer telimi men qosalqy sharýashylyqqa arnalǵan qurylystar bar. Baý-baqsha ósirip, úı sharýashylyǵyn júrgizýge óte qolaıly.
Baspanaly bolý baqyty buıyrǵan turǵynnyń biri Farıda Kómekovanyń jeti balasy bar. Buǵan deıin eki bólmeli aıadaı ǵana páterde turyp kelgen otbasy keń de eńseli úıdi uzaq ýaqyt kútken eken. Qazir Kómekovtar otbasynyń tórt bólmeli úıi jáne 12 sotyq jer telimi bar.
– Kúıeýimiz ekeýmiz de jumys isteımiz, biraq biz úshin baspanaǵa qol jetkizý túıini sheshilmegen qıyn másele bolyp kelgen edi. Búgingi kún – biz úshin eń baqytty kún! – deıdi kóp balaly ana, «Kúmis alqa» ıegeri Farıda Kómekova qýanyshy qoınyna syımaı.
Taǵy bir kópbalaly ana Lázzat Aqmaǵanbetova úı alý kezeginde 13 jyl turypty. О́ziniń úıelmeli-súıelmeli bes balasy bar.
– Men sońǵy kúnge deıin baspanaly bolatynymyzǵa sene almaǵan edim. Osy ıgi iske qatysy bar qaıyrymdy jandarǵa degen alǵysymyz sheksiz! – deıdi tórt bólmeli úıdiń kiltine ıe bolǵan kópbalaly ana.
Saltanatty shara barysynda oblys ákimi Erlan Qoshanov Elbasynyń tapsyrmasy boıynsha óńirde kópbalaly otbasylarǵa erekshe kóńil bólinetinin atap ótti. Sonymen qatar, ol «Astana Motors» kompanııasyna kópbalaly otbasylarǵa kómek kórsetkeni úshin alǵys aıtty. Sondaı-aq, óńir basshysy jergilikti mekteptiń talantty túlekteri Nurlan Smaǵulov qurǵan «Bilim qorynyń» arqasynda elimizdiń úzdik joǵary oqý oryndarynda bilim alý múmkindigine ıe bolyp otyrǵanyna da rızashylyq sezimin bildirdi.
– Táýelsizdigimiz qalyptasa bastaǵannan beri memleket kásipkerlerdi qoldap keledi. Búginde aıaǵyna nyq turǵan bıznestiń áleýmettik máselelerdi sheshýde memleketke kómektesetin kezi keldi. Balalarymyz ben nemerelerimiz osyndaı jany jomart jandardy úlgi ete otyryp, ósip-ónýi tıis. «Týǵan jer» ıdeıasynyń ózi týǵan aýylyńdy umytpaı, jerlesterińe kómek kórsetý emes pe?! – dep atap ótti Erlan Qoshanov.
Eske salsaq, «Astana Motors» kompanııasy 2011 jyly Aqadyrda balalar-jasóspirimder sport mektebin salyp bergen bolatyn. Onda júzý basseıni men kúres zaly bar. Sporttyq nysanda dzıýdo, sambo, qazaq kúresi jáne fýtboldan jarystar turaqty túrde ótip turady. Mektep tárbıelenýshileri halyqaralyq týrnırlerge jıi shyǵyp, júldeli oryndarǵa ıe bolyp júr.
Sonymen qatar, bıyl Aqadyr kentinde 70 páterli turǵyn úı qalpyna keltirilip, paıdalanýǵa berilgenin de aıta ketken jón. Baspanaly bolǵandar arasynda kópbalaly otbasylar da bar. Olardyń barlyǵy turǵyn úı alýǵa kezekte turǵandar tiziminde bolǵan. Jalpy, Shet aýdanynda barlyǵy 41 kópbalaly otbasy turady.
Bıyl Aqadyr kentinde 32 páterli úı salý josparda bar. Budan bólek, kelesi jyly taǵy eki kópqabatty úı paıdalanýǵa berilmekshi. Al «Astana Motors» kompanııasynyń basshysy Nurlan Smaǵulov aldaǵy ýaqytta da jerlesterine arnalǵan qaıyrymdylyq sharalarynyń jalǵasyn taba beretinin jetkizdi.