Qasymjan Tashmetov pen toǵyz baýyrynyń balalyq shaǵy Maı aýylynda ótken. Alaıda eldi mekenniń úshjúzden astam turǵyny bas aýyryp, baltyr syzdaı qalsa, aýdan ortalyǵyna qaraı shapqylaıtyn. Feldsherlik-akýsherlik pýnkttiń bolmaýynyń zaryn ábden tartqan edi.
Q. Qurmanbaev atyndaǵy týberkýlezge qarsy dıspanserdiń bas dárigeri, medısına ǵylymdarynyń doktory Qasymjan Qalıjanuly Kókshetaý qalasynda tursa da, týǵan jer tósine at basyn jıi buryp, qaraılasyp turady. Ol jurtshylyqqa bergen ýádesinde turdy. Eki mıllıon teńge jeke qarajatyna ıesiz qalǵan úıdi jóndetip, feldsherlik-akýsherlik pýnkt retinde turǵyzyp berdi.
Medısınalyq pýnkt jaıly ári keń. Terapevt, pedıatr, em-dom kabınetteri bar. Bilikti maman qyzmet kórsetedi.
«Qajetti qural-jabdyqtar jetkilikti. Elektrokardıogramma apparaty, tonometr, nebýlaızer qoıylǵan. Internet jelisi jumys isteıdi», deıdi medısınalyq ortalyqtyń meıirbıkesi Janargúl Qusaıynova.