Onyń basty sebebi qaladaǵy káriz jelilerine sarqyndy sýdyń tazartylmaı quıylatyny bolyp otyr. Sondaı-aq «Qazgıdromet» AQ-nyń avtomattandyrylǵan beketteri aýadaǵy kúkirtti sýteginiń kóbeıip ketý deregin birneshe ret tirkegeni de oblys ortalyǵyndaǵy ekologııalyq ahýaldy kúrdelendire túsýde. Aıtalyq, belgilengen shek boıynsha onyń qalypty deńgeıi 0,8 mıllıgramm bolsa, bul kórsetkish ruqsat etilgen normadan 10 ese asyp ketken.
Taǵy bir másele, «Aqbulaq» AQ mamandary jyl basynan beri qaldyq sýdaǵy zııandy zattar quramy men mólsherin anyqtaý úshin 203 ret synama alý jumystaryn júrgizdi. Onyń nátıjesi kóńil jabyrqatady. Iаǵnı, tekserister kezinde Aqtóbe qalasyndaǵy 100 kásiporynnan shyǵarylǵan las sýda zııandy zattar kóp mólsherde tabylǵan.
«Aqbulaq» AQ vıse-prezıdenti Tımýr Babanaevtan osy máseleniń sebebin suraǵan edik.
«Kásiporyn ıeleri bıopreparattar nemese maı tutqysh qondyrǵylar men katalızatorlardy ornatý arqyly zııandy zattar kólemin ájeptáýir azaıta alady. Biz óz tarapymyzdan olarǵa osyndaı talap-tilekter qoıyp kelemiz», dedi ol.
Búginde Aqtóbe oblysy boıynsha ekologııa departamenti aǵyndy sýlardy jıi aǵyzatyn kásiporyndardy anyqtaý maqsatynda josparly tekserister jasaýda. Aqtóbe qalasyndaǵy káriz júıesine 3800-den astam abonent sý aǵyzady. Onyń 469-y óndiristik sıpattaǵy kásiporyndar men nysandar bolsa, 156-y qoǵamdyq tamaqtandyrý oryndary eken.
Buǵan deıingi zertteýler spırtti ishimdikter men gazdalǵan sýsyndar shyǵaratyn oryndar las sýdy eń kóp aǵyzatyn nysandardyń qatarynda ekenin aıǵaqtaıdy. 2018 jyly «Aqtóbe» AQ eki arada jasalǵan kelisimge sáıkes aǵyndy sýdaǵy lastaýshy zattardyń konsentrattaryn azaıtatyn preparattar qosý jóninde usynys jasapty. Sonymen birge katalızator qoıý arqyly oryn alǵan olqylyqtyń zardabyn azaıtý jóninde másele qoıyldy. Áıtse de atalǵan kásiporyn buǵan mán bermeı keledi.
Túptep kelgende bul máseleden zardap shegetin qala turǵyndary.
AQTО́BE