Keshe óńir basshysy Ońdasyn Orazalınniń tóraǵalyǵymen halyqtyń asa muqtaj tobyn baspanamen qamtamasyz etý suraqtary boıynsha jıyn ótti. Atqarylǵan jumystar týraly Aqtóbe qalasynyń ákimi Ilııas Ispanov esep berdi.
«Oblys boıynsha 30 myń adam baspana kezeginde tursa, olardyń ishinde 23 500-i Aqtóbe qalasynda. Bul másele birden sheshilmeıdi, biraq tıisti jumystar júrgizilip jatyr jáne biz eń aldymen asa muqtaj jandardy baspanamen qamtamasyz etý úshin barlyq múmkindikti jasaımyz. Osy jyldyń ózinde oblysta 1 mln m2-den asa turǵyn úı salyndy, bul degenińiz 8 myńnan asa páter. Olardyń jartysy memleket qoldaýynyń arqasynda az qamtylǵan otbasylarǵa tıimdi sharttarmen beriletin bolady. Halyqty turǵyn úımen qamtamasyz etý – bizdiń jumysymyzda basymdyq bolyp tabylady. Bıyl bizdiń oblysta «Baqytty otbasy» baǵdarlamasymen kópbalaly jáne tolyq emes, sonymen qatar, múmkindigi shekteýli bala tárbıelep otyrǵan otbasylar úshin 1600 páter paıdalanýǵa beriledi»,- dedi oblys ákimi.
Osy jyldyń basynan beri halyqtyń áleýmettik jaǵynan az qamtylǵan tobyn turǵyn úımen qamtamasyz etý úshin arnaıy qurylǵan jumys toby tek Aqtóbe qalasynda azamattardyń baspana berý týraly 170 ótinishin qaraǵan. 97 ótinish oń sheshimin tapty. Nátıjesinde 45 otbasy satyp alý quqyǵymen jaldamaly páterlerge ıe boldy. Qalǵan ótinishter boıynsha qazirgi tańda kelisimsharttar jasalyp jatyr.
Sondaı-aq, az qamtylǵan, kópbalaly jáne múmkindigi shekteýli bala tárbıelep otyrǵan otbasylardy baspanamen qamtý úshin demeýshilerdiń de qarajattary belsendi túrde tartylýda. Máselen, bıyl tek «Qolǵanat Aqtóbe» qoǵamdyq qorynyń ózi 37 otbasynyń «Baqytty otbasy» áleýmettik turǵyn úı ıpotekalyq baǵdarlamasy boıynsha alǵan baspanalarynyń bastapqy jarnasyn tóledi. Atalmysh qordyń ókili Altynaı Muhanovanyń aıtýynsha, bul maqsatqa jalpy somasy 22,7 mln teńge bólingen. Qarajatty kásipkerler bergen. Sonymen qatar, «Baqytty otbasy» baǵdarlamasy boıynsha jyldyq paıyzdyq mólsherleme nebári 2 paıyz.
Oblys ákimi qaıyrymdylyqty damytýǵa qosqan úlesi úshin kásipker Bolat Iteǵulovqa «Aqtóbe qalasynyń 150 jyldyǵy» medalin tapsyrdy. Kásipker Shahan Joldasbaev ta áleýmettik kásipkerlikti damytyp, múmkindigi shekteýli jandar arasynda sportty dáriptegeni úshin osy medalmen marapattaldy.
Jıyn aıaqtalǵannan keıin oblys ákimi Ońdasyn Orazalın halyqtyń asa muqtaj tobyna berilip jatqan turǵyn úılerdi qarap shyqty, sonyń ishinde múmkindigi shekteýli balany jalǵyz tárbıelep otyrǵan Gaýhar Ábdirazaqovanyń úıinde boldy. Ol «Qolǵanat Aqtóbe» qoǵamdyq qory bergen bastapqy jarnanyń kómegimen «Nur Aqtóbe» turǵyn úı alabynan memlekettik baǵdarlama arqyly úıli boldy.
«О́z as úıim, jeke jýynatyn bólmem bolsa dep armandaǵan edim. Osynyń bári bizde bolǵan joq. Biraq qazir bári jaqsy, bizdiń jańa páter jaıly. Qoldaý kórsetkeni úshin memleketke rahmet. Endi memlekettiń kómegimen óz isimdi ashýdy josparlap otyrmyn»,- dedi Gaýhar Ábdirazaqova.
О́ńir basshysy kópbalaly analardyń máselesi ári qaraı da sheshiletini jaıynda atap ótti.
«Memleket kómegine muqtaj otbasynyń birde biri nazardan tys qalmaıdy»,- dedi Ońdasyn Orazalın.
Temir Qusaıyn