Bıyl Qazaqstan Jazýshylar odaǵynyń qurylǵanyna 85 jyl tolyp otyr. Tarıhy tereńde jatqan rýhanııat ordasy el birligi men qoǵam damýyna qomaqty úles qosyp keledi. Kezdesýde Aıda Balaeva ulttyq rýhanı áleýetti ilgeriletý isinde qalamgerler qaýymy aýqymdy ról atqaratynyn aıta kelip, Prezıdent Qasym-Jomart Toqaev shyǵarmashylyq ókilderiniń el úshin atqarǵan jumystaryn joǵary baǵalaıtynyn jetkizdi.
«Aqyndarymyz ben jazýshylarymyz óziniń qalam qýatyn ult ıgiligine, memleket táýelsizdigin tuǵyrly etýge arnady. Talaı ıgi bastamalarǵa serpin bergen «Rýhanı jańǵyrý» baǵdarlamasynyń júıeli júzege asýyna, Elbasynyń «Uly dalanyń jeti qyry» maqalasynan týyndaıtyn mindetterdi jurtshylyqqa jetkizýde olar aýyzbirshilik tanyta bildi. Tıisinshe memleket te ádebıet pen ónerdi udaıy qoldap keledi. О́tken jyly ǵana «Jahandaǵy zamanaýı qazaqstandyq mádenıet» jobasy aıasynda el tarıhynda tuńǵysh ret ádebıetimizdiń proza jáne poezııa janryndaǵy irgeli týyndylary BUU-nyń alty tiline aýdaryldy. Olardyń árbiri keminde 10 myń tırajben jaryq kórip, álemniń jetekshi ýnıversıtetteriniń kitaphanalaryna tegis tarady», – dedi Aıda Balaeva.
О́z kezeginde sóz alǵan aqyn-jazýshylar da barsha odaq músheleri atynan Memleket basshysyna alǵysyn bildirip, bul olarǵa alys-jaqyn aımaqtardaǵy kóptegen sharýany ońtaıly retteýge kómek kórsetetinin jetkizdi.
– Árdaıym memlekettiń qoldaýyn sezinip kelemiz. Kúni keshe ǵana Jazýshylar odaǵyna qarasty Shyǵarmashylyq úıi qaıta jasaqtalyp, shıpajaıǵa aınaldy.Ult ádebıetine jasaǵan qamqorlyǵy úshin Qasym-Jomart Kemelulyna zor alǵysymyzdy bildiremiz, – deıdi Qazaqstan Jazýshylar odaǵynyń basqarma tóraǵasy, aqyn Ulyqbek Esdáýlet.
ALMATY