Qaıyrymdylyq sharasynda kásipker Amangeldi Máıtekov kópbalaly, tolyq emes otbasy, jáne múgedek bala asyrap otyrǵan 5 otbasyǵa 1 jáne 2 bólmeli páter kiltin tabystady. Sondaı-aq, shilde aıynan bastalatyn «Baqytty otbasy» jobasyna alǵashqy qatysýshy 20 azamatqa 500 myń teńgeniń sertıfıkatyn syılady. Bul otbasylar alǵan qarajatyn páterdiń alǵashqy jarnasyna jumsaıtyn bolady. Igi sharaǵa oblys ákimi Ońdasyn Orazalın qatysyp, baspanaly bolǵan azamattardy quttyqtady. Qaıyrymdylyq jasaǵan kásipker azamatqa alǵysyn bildirdi.
«Oblys boıynsha 30 myń adam baspana kezeginde tursa, olardyń ishinde 23 500-i Aqtóbe qalasynda. Bul másele birden sheshilmeıdi, biraq tıisti jumystar júrgizilip jatyr. Biz eń aldymen asa muqtaj jandardy baspanamen qamtamasyz etý úshin barlyq múmkindikti jasaımyz. Osy jyldyń ózinde oblysta 1 mln sharshy metrden asa turǵyn úı salynady, bul degenińiz 8 myńnan asa páter. Olardyń jartysy memlekettiń qoldaýynyń arqasynda az qamtylǵan otbasylarǵa tıimdi sharttarmen beriletin bolady. Demeýshilerdiń bergen qarjysyna 2-3 azamatqa páter alýǵa da bolady. Alaıda, sol qarjyny 20-30 adamǵa alǵashqy jarna retinde bergen tıimdi bolyp otyr. О́ıtkeni, olar jaldamaly páterge tóleıtin qarajatty endi óz menshiginde qalatyn baspanasy úshin tóleıdi. О́tkir másele osylaı júıeli túrde sheshilip keledi», dedi oblys basshysy.
Qaıyrymdylyq shara Halyq ártisi, QR Eńbek sińirgen qaıratkeri ánshi, Nurlan Abdýllınniń konsertimen jalǵasyn tapty. Konsert bıletinen túsken qarajat túgeldeı túrli áleýmettik toptaǵy azamattarǵa beriledi.