«Búgin biz sol jaǵalaýdaǵy jańa úsh shaǵyn aýdannyń alǵashqy úıin salýǵa kirisýdemiz. Buǵan deıin salynǵan shaǵyn aýdanǵa 70 paıyzǵa jýyq páter ıesi qonystanyp úlgerdi, jyl sońyna deıin munda 2466 páterlik 53 úı salynady. Jalpy sońǵy 6 jylda aımaqta 361 kóp qabatty úı nemese 7000 páter salyndy. Onyń ishinde 600 astam páterdi burynǵy apatty úılerdiń turǵyndary aldy. Qyzylorda oblysy – apatty jaǵdaıdaǵy turǵyn úı máselesin tolyq sheshken Qazaqstandaǵy birden-bir aımaq», - dedi oblys ákimi Qyrymbek Kósherbaev.
"Qyzylorda oblysynda jyl saıyn qurylys jumystarynyń kólemi artyp keledi. Sońǵy 5 jylyń ózinde oblys ortalyǵynda 4 myń páterlik 80 kópqabatty úıdiń qurylysy júrgizildi. Bul - qyzylordalyqtardyń ál-aýqatynyń ósip jatqanynyń dáleli. Aldaǵy ýaqytta respýblıkalyq bıýdjet esebinen 320 oryndyq balabaqsha men 600 oryndyq mektep jáne memlekettik-jekemenshik áriptestik aıasynda 500 oryndyq emhana salý josparlanýda", - dedi aımaq basshysy.
Esterińizge sala keteıik, Qyzylordanyń sol jaǵalaýyndaǵy qurylys 2016 jyly bastalǵan edi. О́tken jyly sol jaǵalaýdaǵy jańa qalada jeke ınvestorlar qarajaty esebinen salynǵan 14 kópqabatty turǵyn úı, sondaı-aq "Rýhanı jańǵyrý" ortalyǵy men 320 oryndyq balabaqsha paıdalanýǵa berildi. Al 2019 jyly "Bolashaq" ýnıversıteti kampýsy men Jastar ortalyǵynyń qurylysy aıaqtaldy.
Sońǵy 6 jylda óńirde 3 mln. sharshy metr turǵyn úı paıdalanýǵa berildi. Oblys ortalyǵynda 2013-2018 jyldary 15 jańa shaǵyn aýdan salynǵan.