«Arys turǵyndary óz qalalaryna orala bastady. Qazir olarǵa eń aldymen azyq-túlik, jeke gıgıenalyq quraldar, kıim-keshek qajet. Osyndaı qıyn ýaqytta judyryqtaı jumyla bilgen barlyq qala turǵyndaryna alǵysymdy bildiremin. Apat bolǵan alǵashqy eki kúnde memlekettik organdar men kásiporyndar Arysqa kómek retinde bir kúndik eńbekaqy esebinen 200 mln teńge aýdardy. Keshe 3 júk kóligi shyqqan, búgin tórteýin attandyryp otyrmyz. Al erteń taǵy 3 júk kóligin jiberemiz», dedi ótken jumada jolǵa shyqqan kómek kerýenin shyǵaryp salýǵa kelgen Nur-Sultan qalasy ákiminiń orynbasary Erlan Kanalımov.
«Jas sarbaz» jasóspirimder áskerı-patrıottyq qozǵalysynyń Nur-Sultan qalalyq fılıalynyń tóraǵasy Ashat Nalshybektiń aıtýynsha, astanalyq turǵyndar Arystaǵy aǵaıynǵa barynsha belsendi kómek jınap jatyr. «Elorda halqy Arystaǵy apatty kúızele qabyldaǵanyn kómektesýge nıetti adamdardyń moldyǵynan baıqaýǵa bolady. О́zim de Arystyń týmasymyn. Osynda oqýǵa túsip, jumysqa ornalastym. Qıyn kezde zardap shekken jurtqa kómek qolyn sozyp jatqan nursultandyqtarǵa Arystyń týmasy retinde alǵys aıtamyn. О́z zamandastarymyz qarjylaı kómek jınaý úshin birlesip baryp qan da tapsyrdy. Sonyń aqshasyn korporatıvtik qorǵa aýdardy», deıdi ol.
Erlan Kanalımov Arys qalasyndaǵy úılerdi qalpyna keltirýge 19 qurylys jasaǵy qatysatynyn aıtty. «Qala ákiminiń taǵy bir orynbasary qurylys mamandarymen Arysta júr. Bizdiń usynysymyzdy elordanyń qurylys kompanııalary qoldap, 19 qurylys jasaǵy quryldy. Ár jasaqta keminde 10 maman bar. Qurylys materıaldaryn da ózimiz alyp baramyz. Aldymen úı ıelerimen birge ár úıdiń aqaý aktisi jasalady. Sol boıynsha bizge bólingen 9-sektordaǵy 500 úıdiń qaısysyn jóndeý kerektigi anyqtalady. 19 jasaq palata qalashyǵynda jatyp, bir aıdyń ishinde úılerdi qalpyna keltiredi. 50 erikti jas baryp, turǵyndardyń kóshýine kómektesedi. Qazirdiń ózinde 50 erikti stýdent medısınalyq kómek kórsetip júr», dedi ákimniń orynbasary.
Maıgúl SULTAN,
«Egemen Qazaqstan»