Dostyq úıine jekelegen adamdar, kásipkerler kelip, kómek qoldaryn sozdy. Olar marafonǵa bir kisideı qatysyp, Arys qalasyndaǵy jarylystardan zardap shekken balalardy birinshi qajetti zattarmen qamtamasyz etýdi uıǵarypty.
Analar keńesiniń tóraıymy Kúlimkóz Smaıylovanyń aıtýynsha, qıyn jaǵdaılarda aýyrtpashylyqty birge kóterisý– qazaqstandyqtar úshin qalyptasqan dástúr. Materıaldyq janashyrlyqpen qatar moraldyq jaǵynan da demeýdiń mańyzy zor. Qaıyrymdy jandardyń qoldaýy arqasynda 15 shara ótkizilip, mektep, keńse taýarlary, oqý quraldary, oıynshyqtar, kıim-keshek molynan jınalǵan. Oqýshylar óńirdegi saýyqtyrý lagerlerinde de demalatyn bolady. Sonymen qatar júzden astam hat-tilekter,beınerolıkter daıyndalǵan.
1998 jyldan beri kıim tigýmen aınalysyp kele jatqan «Sens Fashion» kompanııasynyń ónimderi úlken suranysqa ıe. Túrli qaıyrymdylyq sharalardan da shet qalǵan emes. Osy joly arystyq oqýshylarǵa arnap mektep formalaryn ázirlep ákelipti.
«Júrekteri meıirimge toly adamdardy aksııaǵa belsene qatysýǵa shaqyramyn. Kishkentaı balaqaılardyń tileýin tilep, qýantýdan asqan baqyt joq», deıdi kásiporynnyń menedjeri Lıýdmıla Klımova.
Oblystyq isker áıelder qaýymdastyǵynyń jetekshisi Baqytjan Sámıeva Aıyrtaý aýdanynda analar keńesiniń kóshpeli májilisin ótkizip, turǵyndar tarapynan aksııa qoldaý tapqan. Sol sııaqty Mamlıýt aýdanyndaǵy analar keńesi de ıgi iske belsene kirisip ketti.
Soltústik Qazaqstan oblysy