1,4 mln adamǵa ataýly kómek kórsetildi

– Bıyl áleýmettik kómek pen qam­syzdandyrýǵa kózdelgen qarajat kólemi 674 mlrd teńgege ósip, 3,3 trln teńgeni qurady. Bazalyq zeınetaqy 80 paıyzǵa kóbeıdi. Qazaqstandyq­tar­dyń ótinishteri boıynsha eńbek ótili esepteletin boldy. Soǵan sáıkes, ortasha jalaqy 81 myń teńgeni qurap otyr. Kelesi jyldan bastap engiziletin jańalyqtardyń biri – zeınetaqy qoryna jumysshylardyń aýdaratyn tólemderin 5 paıyzǵa kóbeıtý. Iаǵnı qazir 10 paıyzdy ózderi tóleıtin bolsa, oǵan qosymsha jumys berýshiler tóleıtin bolady, – dedi Berdibek Saparbaev. 

Mınıstr, bıyl 1 sáýirden bas­tap memlekettik qyzmetkerlerdiń jalaqysy orta eseppen 30%-ǵa ós­kenin jáne ol 1 mıllıonnan astam adam­dy qamtylǵanyn atap ótti. Son­daı-aq ol «Eńbek» baǵdarlamasy tolyǵymen oryndalǵanyn sabaqtaı kelip, 400 myńnan astam qazaqstandyq jumysqa tartylǵanyn aıtty.

– 14 myń adamǵa shaǵyn nesıe berilip, 3 myńǵa jýyq azamat grant ıelendi. Memleket bas­shy­sy­nyń tapsyrmasyna sáıkes, qazaq­standyqtardy onyń ishinde áleý­met­tik az qamtylǵan ári kóp balaly otbasylardy, jarymjan jandardy qoldap, jumyspen qamtý úshin qosymsha grant bóldik. Búgingi naq­tylanǵan bıýdjet boıynsha granttardy 23 myńǵa kóbeıtemiz. Oǵan – 12 mlrd teńge bólinedi. Mıkronesıe 20 mlrd, qysqa merzimdi oqytýǵa – 13 mlrd, sondaı-aq «Bıznes Bastaý» baǵdarlamasyna 3 mlrd teńge qaras­ty­rylmaq. Al ońtústik aımaq­tardan turǵyndardy soltústik óńirge kóshirý úshin qosymsha 3 mlrd qarajat aýdaryldy, – dedi sala mınıstri. 

Eńbek daýlarynyń aldyn alý maq­satynda jaýapty vedomstvo eń­bek kelisimsharttarynyń elektron­dy nusqasyn ázirlep jatyr eken. B.Sa­par­baev bul kóptegen túıtkildi problemalardy retteýge septesetinine senimdi. 

 Eńbek jáne halyqty áleýmettik qorǵaý mınıstri bıznestiń áleýmettik jaýapkershiligi sheńberinde 160 myń otandasymyzǵa 37 mlrd teńgeniń kóleminde kómek kórsetilgenin jipke tizdi. Buǵan qosa spıker kóshi-qon saıa­saty da qarqyndy júrip jatqanyn, syrttaǵy qandastardy elge qaıtarý bo­ıynsha jumystar jalǵasyn tap­qanyn habardar etti. Bıyl 6 myń qandasymyzǵa tarıhı Otanyna oralý baǵy buıyrypty. 

Sala basshysy ústimizdegi jyly ataýly áleýmettik kómekpen 285,7 myń otbasy nemese 1,4 mıllıon qazaq­standyq qamtylǵanyn naqtylady.

– «Áleýmettik qamqorlyq» sharasy aıasynda 1 shildeden bastap múgedek balalar jáne bala kezinen I toptaǵy múgedektigi bar 18 jastan asqan azamattardy kútý boıynsha memlekettik járdemaqylardyń mólsheri artady, – dedi B.Saparbaev.

 Ol 100 myń azamatqa beriletin jár­dem­aqynyń mólsheri 31 183 teńge­den 41 578 teńgege deıin ulǵaıatynyn málimdedi.

 Jaqsylyq MURATQALI,

«Egemen Qazaqstan»