Respýblıkanyń basym bóligi antısıklon yqpalynda bolǵandyqtan jaýyn-shashynsyz aýa raıy kútiledi. Tek Qazaqstannyń batysynda, soltústik-batysynda atmosferalyq fronttardyń ótýine baılanysty keı jerlerde jańbyr jaýyp, naızaǵaı jarqyldaıdy. Daýyl soǵyp, burshaq jaýýy yqtımal. Bul týraly «Qazgıdromet» RMK habarlady.
Túnde Atyraý, Batys Qazaqstan, Aqtóbe oblystarynyń keı jerlerinde kún kúrkireıdi, burshaq jaýýy múmkin.
Batys Qazaqstan, Aqtóbe oblystarynyń keı jerlerinde jeldiń ekpini 15-20 m/s jetedi. Shyǵys Qazaqstan, Pavlodar, Qaraǵandy, Qyzylorda, kúndiz Qostanaı oblystarynyń keı jerlerinde jel 15-20 m/s deıin kúsheıedi.
Aqmola, Almaty, Jambyl, Túrkistan, Qyzylorda, Qostanaı, Soltústik Qazaqstan, Aqtóbe oblystarynda aptap ystyq kútiledi. Qaraǵandy oblysynyń keı jerlerinde óte qatty ystyq bolady. Qyzylorda, Túrkistan, Almaty, Jambyl, Aqtóbe, Qaraǵandy, Shyǵys Qazaqstan oblystarynyń keı jerlerinde joǵary órt qaýpi saqtalady.