Osydan týra bir jyl Denıs Tenniń aýyr jaralanyp, jansaqtaý bólimine túskeni týraly sýyt habar lezde tarap ketti. Elimizde ǵana emes, shetelderde de keńinen tanylyp úlgergen Denıstiń bar álemdegi jankúıeri onyń amandyǵy úshin duǵa tilegen edi. О́kinishke qaraı, Denısti ajaldan arashalaý múmkin bolmady. Tanymal sportshy avtokólik urylary jumsaǵan pyshaq soqqysynan úsh lıtr qan joǵaltyp, túski saǵat 15:00-den óte kóz jumdy. Bul qazaq sporty ǵana emes, mánerlep syrǵanaý álemindegi orny tolmas qaza bolatyn...
Denıstiń qazasy eshkimdi de beı-jaı qaldyrǵan joq. Barsha Qazaqstan halqy namysty ulynan aıyrylyp, qaıǵydan qan jutsa, álemniń ár túkpirindegi jankúıer tanymal sportshydan kóz jazyp qalǵanyna ókindi. Sebebi, Denıs óziniń eki músheldik ómirinde kópshilik júreginen oryn alyp úlgergen edi.
Denıs Ten 1993 jyly Almatyda dúnıege kelip, óziniń súıikti qalasynda mánerlep syrǵanaýmen shuǵyldana bastady. Sporttyń bul túrinen baı tarıhy men syrǵanaıtyn muz aıdyny bolmasa da, kishkentaı Denıs óz armanyna bas tartpady. Saýda ortalyqtaryndaǵy alaqandaı muz aıdynda jattyǵyp, keıin sheteldik mamandardyń kózine túse bastady. Talantty Denısti Reseıdiń tanymal bapkerleri óz qamqorlyǵyna alyp, áıgili Tatıana Tarasova, Elena Býıanovalar jol kórsetti. Keıin áıgili amerıkalyq bapker Frenk Kerroldan tálim alyp, álemdik jarystarda júlde saldy.
Denıs álemdik deńgeıdegi alǵashqy júldesin 2013 jyly jeńip aldy. Sol jyly Kanadanyń London qalasynda ótken álem chempıonatynda qazaqstandyq sportshy Patrık Chanǵa ǵana ese jiberip, kúmis júldeger atandy.
2014 jyly Sochı Olımpıadasynda Qazaqstan qorjynyna jalǵyz júldeni salǵan da Denıs edi. Tórtjyldyq dodasynda talantty sportshy úzdik úshtikke enip, mánerlep syrǵanaýdan Olımpıada júldegeri atanǵan tuńǵysh qazaqstandyq sportshy retinde tarıhta qaldy.
2015 jyl da Denıs úshin jemissiz bolǵan joq. Qytaıdyń Shanhaı qalasynda ótken álemdik dodada ol qola júldege qol sozyp, óziniń álemdik deńgeıdegi sportshy ekenin taǵy bir dáleldedi.
Keıin Denıske jaraqaty jolbaılaý bolyp, biraz dodalarda júldeger qataryna ilige almady. Dese de, 2017 jylǵy Ýnıversıada oıyndarynda top jaryp, 2018 jylǵy Phenchhan Olımpıadasyna jaraqatyna qaramastan qatysty.
Phenchhan úsh birdeı olımpıadalyq sıklde óner kórsetken Denıstiń sońǵy Olımpıadasy edi... Talantty sportshy 2018 jyldyń 19 shildesi kúni avtokólik urylarynyń qolynan kóz jumdy.
Denıstiń qazasynan soń oǵan arnalǵan túrli is-sharalar ótkizilip, Almatyda eskertkish boı kóterdi. Onyń atyndaǵy týrnır Halyqaralyq konkı sporty túrleri federasııasynyń (ISU) kúntizbesine endi.
20 shilde kúni Almatyda Qazaqstan jáne álem juldyzdarynyń qatysýymen «Denıs Ten jáne onyń dostary» atty muzdy shoý ótedi.