Almaty qalasynyń Qoǵamdyq densaýlyq basqarmasy 1-30 tamyz aralyǵynda turǵyndardy qoljetimdi medısınamen qamtamasyz etý maqsatynda densaýlyq aılyǵyn bastap ketti. Qazirgi kezde qalanyń barlyq aýdandarynda sapaly medısınaǵa qol jetpeıtin aýmaqtarda mobıldi dárigerler keńesi jumys isteýde. Qajetti quraldarmen tolyqqandy qamtamasyz etilgen jyljymaly keshenderde terapevt, balalar dárigeri, kardıologtar men ózge de salalyq dárigerler qyzmet kórsetýde.
Densaýlyq aılyǵynyń alǵashqy kúni jyljymaly medısınalyq keshen Túrksib aýdanyna kelip, tórt júzden astam turǵyndy tekserýden ótkizdi. «Nurshashqan» shaǵyn aýdanynyń turǵyndary salalyq mamandardyń qyzmetine júginip, júrek, búırek, býyn, kóz, t.b. aýrýlarǵa tekserilip, tıisinshe keńester aldy. Densaýlyq aılyǵy aıasyndaǵy bul sharaǵa qaladaǵy onkologııa, JQTB, Salaýatty ómir saltyn qurý, juqpaly teri aýrýlary ortalyqtarynyń, № 20 emhananyń kásibı mamandary jumyldyrylǵan.
Almaty qalasynyń Qoǵamdyq densaýlyq basqarmasy basshysy Qanat Tósekbaevtyń aıtýynsha, densaýlyq aılyǵynyń maqsaty qala ortalyǵynan qashyq turatyn aýdan turǵyndarynyń densaýlyǵyna qoldaý kórsetý men qoljetimdi medısınany qamtamasyz etý. О́ıtkeni, qashyqtyqta turatyn qart adamdardyń, balaly analardyń emhanaǵa der kezinde kelip qaralýyna múmkindikteri bola bermeıdi. Sondyqtan da qandaı da bir aýrýdyń aldyn alý maqsatynda qalanyń árbir turǵyny dárigerge ýaqytynda qaralýy lázim. Der kezinde anyqtalǵan aýrýdy emdeýdiń jeńil bolatynyn aıtqan qalanyń bas dárigeri qala turǵyndaryn densaýlyǵyna sergek qaraýǵa shaqyrdy.
Almaty qalasynyń Qoǵamdyq densaýlyq basqarmasy Baspasóz qyzmetiniń málimeti boıynsha, jyljymaly mobıldi keshenderdiń shyǵý kestesimen Almaty qalasy ákimdiginiń resmı saıtynan jáne Instagram, Facebook paraqshalarynan tanysýǵa bolady.
ALMATY