«Jol qadirin júrgen biledi». Jol máselesi turǵyndar úshin árdaıym ózekti. Alaıda, búginde keıbir oblystyq joldardyń sapasy syn kótermeıdi. Aýdan men aýdandy, aýyl men aýyldy jalǵap jatqan joldardyń qyryq jamaý, keıbiriniń tozyǵy jetkenin kóz kórip júr.
Deı turǵanmen atqarylyp jatqan jumystar da jeterlik. Máselen, Jambyl oblysy boıynsha jalpy avtomobıl joldary 9689 shaqyrymdy quraıdy. Onyń ishinde respýblıkalyq mańyzy bar 1152 shaqyrym, oblystyq mańyzy bar 1987 shaqyrym, aýdandyq mańyzy bar 1188 shaqyrym jáne eldi mekenderge tıesili 5362 shaqyrym jol bar. Bulardyń biriniń sapasy bas barmaqpen baǵalarlyq bolsa, endi biriniń sapasy ortasha, al biriniń sapasy tómen deýge bolady.
Jambyl oblystyq jolaýshylar kóligi jáne avtomobıl joldary basqarmasynyń málimetinshe, ótken jyly jol jóndeý maqsatyna 12,1 mlrd teńge bólinip, oǵan 324 nysanda 544 shaqyrymǵa jýyq jergilikti avtojoldar men kósheler jóndelgen. Sonymen qatar 1 kópirdiń qurylysy júrgizilip, 2 jol ótkeli qaıta jańǵyrtylǵan. «Jyl qorytyndysynda jaqsy jáne qanaǵattanarlyq jaǵdaıdaǵy oblystyq jáne aýdandyq mańyzy bar joldardyń úlesi 80,1 paıyzǵa jetkizildi. Al bıylǵy bólingen 14,8 mlrd teńgege 346 nysanda 602 shaqyrym jergilikti avtojoldar men kósheler jóndeledi. Onyń ishinde 16,2 shaqyrym jańa jol salynyp, 6,2 shaqyrym qaıta jańǵyrtylady. Jáne de 30 shaqyrym jol kúrdeli jáne 550 shaqyrym jol orta jóndeýden ótedi», deıdi basqarma basshysy Baqytjan Jánibekov.
Memleket tarapynan tıisti qoldaý kórsetilip, joldar jóndelip jatyr desek te, óńirde áli de birqatar máseleler bar. Atap aıtar bolsaq, oblystyq mańyzy bar Moıynqum aýdany aýmaǵyndaǵy Birlik – Moıynqum – Ulanbel baǵytyndaǵy joldardyń 220 shaqyrymynan bastap tozǵan. Sonymen qatar Sarysý aýdany aýmaǵyndaǵy Toǵyzkent – Dosbol – Shyǵanaq – Sarysý baǵytyndaǵy joldardyń da sapasy syn kótermeıdi. Talas aýdanynan Moıynqum aýdanyna qaraı ótetin Aqkól – Oıyq – Ulanbel jolynyń da jaǵdaıy osyndaı. Joldardyń talaı jyldan beri jóndeý kórmegeni óz aldyna, ózi búlinip jatqan joldardy aýyr júk kólikteri odan ári búldirýde. Osy joldar arqyly árqaısysy 40-50 tonna bolatyn qytaılyq aýyr júk kólikteri Sarysý aýdanyndaǵy Shyǵanaq kentinen shyǵatyn tuzdy kórshi Qyrǵyz Respýblıkasyna qaraı tasymaldaıdy. Sonymen qatar osy kúre joldar arqyly qurylys zattaryn tasıtyn kólikter de qanshama. Al mundaı aýyr júk kólikterin qadaǵalaıtyn Jambyl oblysy boıynsha kóliktik baqylaý ınspeksııasynda bar-joǵy úsh kólik qana bar eken. Onyń ózi respýblıkalyq mańyzy bar joldardy qadaǵalaıdy. Al jol boıyndaǵy aýyr júk kólikterin qadaǵalaý jergilikti jolaýshylar kóligi jáne avtomobıl joldary basqarmasynyń mindetinde emes. Osy bir máselege aldaǵy ýaqytta jergilikti bılik tarapynan tıisti kóńil bólinse, bálkim ózi jóndeý kórmeı kele jatqan joldar odan ári búlinbes pe edi.
Osy ýaqytqa deıin Jýaly, Talas jáne Sarysý aýdandaryn ózara baılanystyratyn oblystyq mańyzy bar Kúıik – Qarabastaý – Qarataý – Jańatas – Saýdakent tasjolyndaǵy túıtkildi máseleler jolaýshylardyń jan aýrýy bolyp keldi. Alaıda, búginde atalǵan baǵyttaǵy joldarǵa aǵymdaǵy jóndeý jumystary júrgizilgen. Sonymen qatar osy ýaqytqa deıin oryn alyp kelgen taǵy bir másele – oblystyq, aýdandyq jáne aýyldyq joldardyń, sondaı-aq, eldi mekender ishindegi shaǵyn kóshelerdiń báriniń de birdeı joldar sanatynda biriktirilip ketýi edi. О́tken jyly bul másele Jambyl oblystyq jolaýshylar kóligi jáne avtomobıl joldary basqarmasynyń tarapynan rettelip, jergilikti mańyzy bar joldardy túgendeý jumystary júrgizilgen. Bul jumystar aǵymdaǵy jyldyń alǵashqy toqsanynda aıaqtalyp, nátıjesinde 745 shaqyrym jol zań talaptaryna sáıkestendirilgen. Eldi meken kósheleriniń sanattary aýystyrylǵan.
Basqarmanyń málimetinshe, bólingen tıisti qarajatqa oblystyq mańyzy bar joldar birtindep jóndelip keledi. Máselen jol máselesine baılanysty búginde óńirde buryn bolmaǵan úsh joba qolǵa alynyp otyr eken. Onyń birinshisi Qyrǵyzstan shekarasyna Taraz qalasyn ońtústikten aınalyp ótý avtojolynyń qurylysy bolsa, ekinshisi Taraz – Sarykemer – Túımekent – Aqsholaq baǵytyn jańǵyrtý jáne úshinshisi Taraz – Jetibaı – Tegistik – Oıyq joldaryn jóndeý. Jıyrma jylǵa jýyq ýaqyttan beri jóndeý kórmegen bul joldar bıyl jóndelip, halyqtyń qaýipsiz qatynaýyna óz yqpalyn tıgizbek.
Jambyl oblysy