Pavlodar oblysynda 23 jalǵan kásiporynnyń atynan qujat daıyndaǵan qylmystyq top quryqtaldy. Bul týraly Pavlodar oblysy boıynsha Ekonomıkalyq tergeý departamenti habarlady.
Belgili bolǵandaı, ákki alaıaqtar zańsyz áreketterin 2015 jyldan beri iske asyryp kelgen. Jedel izdestirý sharalarynyń nátıjesinde shildeniń 27-si kúni Pavlodar oblysynyń eki turǵyny jalǵan kásiporynnyń bank shotynan 7,5 mln teńge alyp jatqan jerinen qolǵa tústi. Kúdiktilerdiń turǵylyqty mekenjaıy men keńselerin tintý barysynda 9 200 AQSh dollary, 20 mln teńgeden asa aqshalaı qarajat, 14 zańdy tulǵanyń elektrondy-sıfrly qoltańbasy, esep qujattary jáne keńse tehnıkasy tabyldy.
«Zańdy belshesinen basqan qylmystyq toptyń áreketinen memleketke 5 mlrd teńge kóleminde salyq túsken joq. Bul somaǵa shamamen 2-3 balabaqsha, mektep jáne aýrýhana salýǵa bolady», delingen quzyrly organ taratqan aqparatta.
Qazir atalǵan toptyń qataryna 30-dan astam adam tartylǵany málim bolyp otyr. Sot sanksııasyna sáıkes, olardyń úsheýi qamaýǵa alynyp, taǵy bir qylmyskerge halyqaralyq izdeý jarııalandy.