Ulttyq akademııalyq kitaphanada uly aqyn Abaı Qunanbaıulynyń týǵan kúnine oraı poetıkalyq mýzykalyq marafon bolyp ótti.
Atalǵan shara hakim Abaıdyń shyǵarmashylyq murasyn nasıhattaý maqsatynda ótkizilip otyr. Merekelik jıyn barysynda «Uly dalanyń dana oıshyly – Abaı», «Ǵasyrlar úndestigindegi rýhanı mura» ıllıýstrasııalyq-kitap kórmeleri, «Abaı poemalary. О́leńderi men aýdarmalary. Qara sózder. Ánderi» men «Abaı-chellendj» kitaptarynyń tusaýkeseri, «Qunanbaı» kıno kórsetilimi, «Abaı – ulttyń rýhanı gıppokraty» atty dóńgelek ústel, «Abaı beınesi sýretkerler kózimen» atty sýret kórmesi uıymdastyryldy.
Rýhanı keshke jınalǵan qalyń kópshilik Abaıdyń «Kózimniń qarasy», «Jelsiz túnde jaryq aı», «Qarańǵy túnde taý qalǵyp» atty ánderin qosyla shyrqap, ózge ult ókilderi ana tilderinde aqyn óleńderi men qara sózderin oqydy.
Is-sharaǵa qoǵam qaıratkeri, tarıh ǵylymdarynyń doktory, professor О́mirzaq Ozǵanbaev, aqyn Baqytjan Tobaıaqov, Qazaqstan Jazýshylar odaǵy Nur-Sultan qalasy fılıalynyń basshysy Dáýletkereı Kápuly, jazýshy Ánes Saraı, satırık Kópen Ámirbek, t.b. zııaly qaýym ókilderi qatysty. Sondaı-aq aqyn aýylynan kelgen Abaıdyń urpaǵy Aqylbaıdan taraǵan Láılá áje shejire tarqatyp, jıynnyń kórigin qyzdyrdy.