Basym kópshiligi temirjolshylar bolyp keletin Arys turǵyndaryna kómek kórsetý úshin «QTJ» UK»AQ qyzmetkerleri 166 mıllıonnan astam teńge jınady. Bul týraly kompanııanyń baspasóz qyzmeti habarlady.
Baspanasyz qalǵan 27 qyzmetker qazaqstandyq shıpajaılarǵa jiberildi. Temirjolshy balalaryna saýyqtyrý lagerlerine tegin joldamalar tabystaldy.
Sondaı-aq salalyq kásipodaqpen Arystaǵy qyzmetkerlerdiń 50 balasyna Nur – Sultan qalasyna saıahattaý-ońaltý týry uıymdastyryldy. Týr barysynda balalarǵa qoldaý kórsetý úshin psıhologtar jáne ózge de mamandar jumys isteıtin bolady.
Kompanııa qyzmetkerleriniń arasynda «Qamkorshy - temirjolshy» áleýmettik qozǵalysy da keń qoldaýǵa ıe. QTJ qyzmetkerleri úlken kólemde sharýashylyq taýarlaryn, tósek kerek-jaraqtaryn, azyq túlik pen kıim-keshek jınady jáne olardy Arysqa jóneltti.
Budan basqa, japa shekkenderge kómek kórsetý úshin Túrkistan oblysy ákimdigi janyndaǵy «Túrkistan» Korporatıvtik áleýmettik damý qoryna 70 mıllıon teńge aýdaryldy.
Jas temirjolshylar bastamasymen «Balalardy mektepke daıyndaımyz» qaıyrymdylyq jobasy iske qosyldy. Bilim kúni qarsańynda kenselik taýarlar men mektep kerek-jaraqtary Arys qalasyndaǵy temirjolshylar balalaryna jetkiziletin bolady. Atalǵan aksııa jalǵasyn tabady.