Basqosýda partııa baǵdarlamalaryn júzege asyrý barysy jáne aldaǵy kezeńdegi jumystyń basym baǵyttary qaraldy.
Elbasy «Nur Otan» partııasynyń 20 jyl ishinde elimizdiń qýatty saıası kúshine aınalǵanyn atap ótti.
- Eń qıyn jyldary partııamyz halyq pen saıasatkerlerdi bir baǵytta jumys isteýge jumyldyrdy. Biz beıbitshilik pen ultaralyq kelisimdi, saıası turaqtylyqty saqtadyq. Sonyń arqasynda aıtarlyqtaı jetistikterge qol jetkizdik. Bul bizdiń elimizge daǵdarys qyspaǵynan shyǵýǵa, ınvestısııa tartýǵa, myńdaǵan jańa kásiporyn jáne jumys oryndaryn ashýǵa, eń bastysy, táýelsizdigimizdi saqtaýǵa jáne nyǵaıtýǵa múmkindik berdi, – dedi Elbasy.
Nursultan Nazarbaev jahandyq ózgeristerge baılanysty partııa aldynda jańa ári kúrdeli mindetter turǵanyn atap ótti.
– Qazaqstan tez damyp kele jatqan elder sııaqty «ortasha tabys qaqpanyna» tap boldy. Dúnıe júzinde orta taptyń tabysyna qatysty toqyraý bar ekenin kórip otyrmyz. Teris jahandyq trendterdiń de yqpaly artyp keledi, – dedi partııa Tóraǵasy.
Elbasy azamattardyń suranystaryna da ýaqtyly jaýap berý qajettigin atap ótti.
– Qıyndyqtarǵa qaramastan, 2050 jylǵa deıingi Strategııada kózdelgen basty maqsat – ozyq damyǵan 30 eldiń qataryna kirýdi, ıaǵnı qazaqstandyqtardyń turmys sapasyn aldyńǵy qatarly elder deńgeıine kóterýdi umytpaýymyz kerek. Buǵan qol jetkizý úshin, eń aldymen, turaqtylyq, birlik jáne barsha qazaqstandyqtardyń qajyrly eńbegi qajet. Muny árqaısymyz jete túsingenimiz jón. Ozyq damyǵan 30 eldiń barlyǵy da osy joldan ótken, – dedi Tuńǵysh Prezıdent.
Nursultan Nazarbaev 2050 jylǵa deıingi damýdyń strategııalyq baǵdarynyń maqsattaryna qol jetkizý úshin partııa tarapynan atqarylyp jatqan jumystyń basym baǵyttaryna toqtaldy.
– Sondyqtan partııamyz, birinshiden, qoǵamdy jumyldyryp, eldiń saıası basshylyǵynyń birligin nyǵaıtýy kerek. Ishki birlik pen kelisim bolǵan kezde ǵana alǵa ilgerileý bolady. Ekinshiden, bizge naqty partııalyq biregeılik jáne qatań tártip, sondaı-aq atqarýshy bıliktiń jaýapkershiligi qajet, – dedi partııa Tóraǵasy.
Elbasy Májilis pen máslıhat saılaýyna sapaly daıyndalýdyń mańyzdylyǵyn atap ótti.
– Aldymyzda mańyzdy naýqan – Májilis depýtattarynyń saılaýy bar. Zańnamaǵa byltyr engizilgen ózgeristerge sáıkes, máslıhattardyń kelesi saılaýy Májilis saılaýy sııaqty alǵash ret partııalyq tizim boıynsha ótedi. Biz jeńiske jetýdi jáne uzaq merzimdi saıası kóshbasshylyqty kózdep otyrmyz. Sondyqtan aldaǵy saılaý naýqanyna búginnen bastap daıyndalýymyz kerek, – dedi Qazaqstannyń Tuńǵysh Prezıdenti.
Sonymen qatar, Elbasy barlyq múddeli azamattardy memlekettiń ózekti áleýmettik-ekonomıkalyq problemalaryn sheshý úshin partııaǵa qosylýǵa shaqyrdy.
– Biz óz usynystaryn aıtqan belsendi azamattar men blogerlerdi kórip, estip otyrmyz. Eger olar shynymen de el taǵdyry úshin alańdaıtyn bolsa, usynylǵan ıdeıalaryn júzege asyrý úshin partııamen birge jumys isteýge shaqyramyz, – dedi partııa Tóraǵasy.
Nursultan Nazarbaev elimizdiń óńirlerindegi turǵyndardyń problemalaryn sheshý úshin «Nur Otan» partııasynyń jumysyn jandandyrý qajettigin atap ótti.
– «Nur Otan» partııasynyń mindeti – tıimdi qoǵamdyq jáne partııalyq baqylaý ornatý, halyqqa berilgen barlyq ýádelerdi sapaly oryndaý. Sondaı-aq, «5 ınstıtýsıonaldyq reformany», partııanyń 2021 jylǵa deıingi saılaýaldy baǵdarlamasyn, Prezıdentimiz Qasym-Jomart Kemeluly Toqaevtyń baǵdarlamasyn júzege asyrý. Bul qujattardyń bári qazaqstandyqtardyń turmysyn jaqsartýǵa baǵyttalǵan, – dedi Elbasy.
Sonymen birge, «Nur Otan» partııasynyń Tóraǵasy qoǵamnyń partııaǵa degen senimin arttyrý úshin aqparattyq-ıdeologııalyq strategııany qabyldaý mańyzdylyǵyna basa mán berdi.
– О́zekti máseleler týraly ashyq aıtyp, olardyń jergilikti jerde sheshilýine atsalysý kerek. Bizdiń mindetimiz – qoǵamnyń senimin arttyrý. Bul úshin búkil qoǵamnyń, saıası kúshterdiń, bıznestiń, zııaly qaýymnyń, sarapshylar men azamattardyń dıalogy qajet. Qolda bar barlyq alańdy paıdalanýǵa tıispiz. Naqty máselelerdi sheshýge baǵyttalǵan jumys júrgizý qajet. Biz azamattarymyzdyń bolashaqqa nyq senimmen qaraýyna jaǵdaı jasaýymyz kerek, – dedi Qazaqstannyń Tuńǵysh Prezıdenti.
Saıası keńes Bıýrosynyń otyrysynda «Nur Otan» partııasynyń partııalyq tizimi boıynsha Parlament Májilisi depýtattarynyń mandattaryn G.N.Ábdiqalyqovaǵa, N.B.Álimjanovqa, N.K.Áshimbetovke jáne J.Q.Omarbekovaǵa berý týraly sheshim qabyldandy.