Jyl basynan beri Almatyda jedel járdem kóligi 43 ret apatqa ushyraǵan. «Sonyń 85 paıyzynda temir tulpar tizgindegen qarapaıym júrgizýshiler kináli dep tanylypty. Negizgi sebepteriniń biri arnaıy transportqa der kezinde jol bermeýdiń saldary. Osy rette búgin qalada «Jol ber - ómir syıla» atty aksııasy uıymdastyryldy, dep habarlaıdy Almaty qalasy ákimdigi baspasóz qyzmeti.
Almaty kóshelerinde dabylyn qosyp, júıitkip júrgen jedel járdem brıgadasy bul joly eshqandaı shaqyrtýǵa asyqqan joq. Tek júrgizýshilerdiń qanshalyqty jol beretindigin synap kórdi. Arnaıy avtokólikter naýqastyń jaǵdaıyna baılanysty 4 topqa bólingen. Sonyń ishinde 1-kategorııa boıynsha eń tez ýaqytta jetýi tıis. Ol qalanyń kez-kelgen jerinde 15 mınýtta bolýy kerek.
«Birinshi, ekinshi kategorııadaǵy jedel járdem kóligi 15 mınýtta shaqyrtylǵan jerge jetýi kerek. Alaıda, biz olardyń shamamen 80 paıyzyna der kezinde bara almaımyz. Keshigýdiń negizgi sebebi, ózge qarapaıym júrgizýshilerdiń jol bermeýi, sondaı-aq, kólik qozǵalysynyń qıyndyǵy», deıdi Almaty qalasy jedel járdem stansasynyń joldaǵy qaýipsizdik ınjeneri Vladımır Fomın.
Almaty qalasy boıynsha sybaılas jemqorlyqqa qarsy kúres Departamenti alǵash ret uıymdastyrǵan bul shara «Almaty - adaldyq alańy» jobasy aıasynda ótti.
Osylaısha, tórt saǵatqa sozylǵan reıd barysynda der kezinde medısınalyq transporttyń júrýine kedergi keltirgen tek 4 júrgizýshige aıyppul jazyldy. Bul jaman kórsetkish emes deıdi sala mamandary. Dese de, osy syndy sharalar udaıy ótkizilip turmaq. Bul kólik júrgizý mádenıetimen qatar, adam ómiriniń mańyzdylyǵyn arttyrady deıdi uıymdastyrýshylar.
ALMATY