Respýblıkalyq bıýdjetten qalaǵa qosymsha 3 mıllıard 450 mıllıon teńge bólinedi.
Almatyda kásipkerler zańsyz jolmen ataýly áleýmettik kómek alyp otyrǵan. Qala ákimdigi sondaı 1350 otbasyny anyqtap, olarǵa járdemaqy berýdi toqtatty. Bul týraly búgin Almaty ákimi Baqytjan Saǵyntaev Bostandyq aýdanynyń turǵyndarymen kezdesý kezinde aıtty.
Belgili bolǵandaı ataýly áleýmettik kómekti zańsyz alyp otyrǵandardyń arasynda kiristerin jasyrǵandar kóp bolypty. Sondaı-aq, birqatar otbasylar ýaqytsha tirkeýge turý arqyly kómekke qol jetkizgen.
«Biz qalaǵa ýaqytsha tirkeýge turyp, balalaryn ózge óńirlerdegi ata-ájelerimen qaldyrǵan otbasylardy anyqtadyq. Eger bizde 9350 otbasy ataýly áleýmettik kómek alatyn bolsa, olardyń 20 paıyzǵa jýyǵynyń turaqty tirkeýi joq. Sóıtip Almaty, Túrkistan jáne Jambyl oblysynyń turǵyndary bizdiń qaladan járdemaqy alyp júrgen. Osyndaı zańsyz jolmen tólem alyp júrgenderdi anyqtaý arqyly 83 mıllıon teńge únemdeldi», dedi Almaty qalasynyń ákimi Baqytjan Saǵyntaev.
Shahar basshysy jyl sońyna deıin tekseris jumystary jalǵasatynyn jetkizdi. Eger kómekti zańsyz alǵandar anyqtalsa, olarǵa tólem birden toqtatylady. Budan bólek Baqytjan Saǵyntaev kópbalaly otbasylardy qoldaýǵa Respýblıkalyq bıýdjetten qalaǵa qosymsha 3 mıllıard 450 mıllıon teńge bólingenin málimdedi.
ALMATY