Búgin Májilis depýtaty Artýr Platonov Qostanaı oblysynyń Fedorov aýdanyndaǵy kóp páterli turǵyn úılerdiń qurylysymen tanysty. Nysan «Nurly jer» memlekettik baǵdarlamasy aıasynda júzege asýda. Bul týraly Májilistiń baspasóz qyzmeti habarlady.
Fedorov aýdanynyń ákimi Táýba Isabaevtyń aıtýynsha qurylys jumystary osy jyldyń mamyr aıynda bastalǵan. Jańa baspanany qoldanysqa qarasha aıynda berý kózdelip otyr.
- Úı 24 páterli bolmaq. Bul «Nurly jer» baǵdarlamasy aıasyndaǵy eń alǵashqy iri jobamyz. Jalpy quny 164 mln teńgeden asady. Respýblıkalyq qazynadan 146,3 mln teńge, qalǵan 20,7 mln teńge qarajat jergilikti bıýdjetten bólindi,- deıdi aýdan ákimi Táýba Isabaev.
Depýtat Artýr Platonov aýdanda atqarylyp jatqan jumystarǵa oń baǵasyn berip, búgingi tańda memleket az qamtylǵan, áleýmettiń osal toptaryna qamqorlyq tanytyp jatqanyn aıtty.
Fedorov aýdanynda búginde 200-den astam otbasy turǵyn úı kezeginde tur. Aýdannyń saıtynda kezekte turǵan azamattardyń tizimin kórsetilgen. Kelesi jyly taǵy bir kóp páterlik baspananyń qurylysyn salý josparlanýda. Aýdan ákiminiń sózinshe, barlyq jumystar ýaqytyly oryndalyp, qurylys jumystary aıaqtalǵan soń, alańdaryn abattandyrý máselesi qarastyrylýda.