Búgin Uly dala eli, barsha qazaqstandyqtar ulyq mereke – elimiz úshin asa mańyzdy Konstıtýsııa kúnin keń kólemde, joǵary deńgeıde atap ótýde. Osynaý mán-mańyzy joǵary jalpyhalyqtyq meıramda elimizdiń tatýlyǵy men yntymaǵyn, turaqtylyǵy pen ornyqty damýyn qamtamasyz etý isinde erekshe mánge ıe Negizgi Zańymyzdyń barlyq izgilikti qaǵıdalary jarqyraı kórinip qana qoımaı, onyń halyq bıligin ornyqtyrý, demokratııalyq qundylyqtarǵa basymdyq berý baǵytyndaǵy mazmuny aıqyndala túsedi.
Elbasy N.Nazarbaevtyń tikeleı basshylyǵymen ázirlenip, eń ozyq quqyqtyq negizderdi qamtyǵan Ata Zańymyzdyń memleketimizdi qalyptastyrýdaǵy, el aldyndaǵy mindetterdi eńserýdegi orny aıryqsha. Sondyqtan da árbir qazaqstandyq azamat el Konstıtýsııasyn halyqty ortaq múddege jumyldyrýshy basty qujat retinde tanıdy.
Qazir qoldanystaǵy, ıaǵnı 1995 jyldyń 30 tamyzynda jalpyhalyqtyq referendým negizinde qabyldanǵan Ata Zańymyzdyń ýaqyt talabyna laıyqty jaýap berip, halyq qalaýymen úndestik tabýyn onyń basty ereksheligi dep qarastyrýǵa bolady.
Konstıtýsııamyz kúshine engeli bergi aralyqta oǵan ýaqyt suranysyna, zaman talabyna saı birqatar ózgeris pen tolyqtyrý engizildi. Bul sheshimder ýaqyt ótken saıyn óziniń durystyǵyn, memlekettilikti qalyptastyrýda, sondaı-aq saıası-ekonomıkalyq, quqyqtyq jáne ıdeologııalyq turǵyda tıimdiligin kórsetti. Məselen, 2017 jylǵy ózgeristerde qoǵamdy demokratııalandyrý isin, halyq bıligin nyǵaıta túsýge, Parlamenttiń rólin, Úkimettiń prezıdenttik basqarý nysany aldyndaǵy jaýapkershiligin arttyrýǵa basymdyq berildi...
Qoryta aıtqanda, eldigimizdiń tuǵyry, temirqazyǵy – Ata Zańymyz – Otanymyzdyń aldynda turǵan basty maqsat-mindetterdi júzege asyrýdyń kepili ári alǵysharty.