Elordamyzdaǵy Beıbitshilik jáne kelisim saraıynda Konstıtýsııa kúnine oraı Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵy, Aqparat jáne qoǵamdyq damý mınıstrligine qarasty Din isteri komıteti uıymdastyrǵan dinı birlestikter ókilderiniń kezekti otyrysy ótti.
Dinı birlestik basshylary táýelsiz memlekettiń qalyptasýyndaǵy Konstıtýsııanyń mindeti týraly áńgime qozǵap, kelisim men dıalogty damytýdaǵy róline erekshe toqtaldy.
Aqparat jáne qoǵamdyq damý mınıstrligine qarasty Din isteri komıteti tóraǵasy Erjan Núkejanovtyń tóraǵalyǵymen ótken jıynǵa Konfessııaaralyq jáne órkenıetaralyq dıalogty damytý jóninde N.Nazarbaev ortalyǵynyń basqarma tóraǵasy Altaı Ábıbýllaev, «Nur-Astana» meshitiniń ımamy Asqar Muqanov, basqa da dinı konfessııalardyń ókilderi jınaldy. Jıynǵa qatysýshylar Konstıtýsııanyń erekshe tarıhı mindetine toqtaldy. Sondaı-aq kópkonfessııalyq jáne kópulttyq qoǵam azamattarynyń memlekettiń damýy men gúldenýine qosqan úlesin, zaıyrly memlekettegi din men dinı dástúrlerdiń mánin, Qazaqstandaǵy qazirgi dinı ahýal, eldegi dinı birlestik ókilderiniń ulttyq deńgeıde kelisim men dıalogty damytýdaǵy rólin erekshe atap ótti. Otyrysqa jınalǵandar Ata Zań beıbitshilik pen qaýipsizdiktiń, kópultty jáne kópkonfessııaly qoǵamnyń irgeli negizi ekenin aıtty. Erjan Núkejanov óz kezeginde dinı birlestik ókilderimen joǵary deńgeıdegi syılastyqqa túzilgen dıalogty jalǵastyrýǵa nıetti ekenin jetkizdi.
Sonymen qatar dinı birlestik ókilderi Qazaqstanǵa qonys aýdarǵan kezderi, birlestikterdiń ashylý tarıhy týraly áńgimelep, estelikterimen bólisti. Jıyn Konstıtýsııa kúnine oraı Qazaqstan halqyn quttyqtaý mátinin qabyldaýmen aıaqtaldy.