Aqparat jáne qoǵamdyq damý mınıstri Dáýren Abaev Aqmola oblysy Selınograd aýdanynyń Qyzylsýat aýylynda mektep oqýshylaryn Bilim kúnimen quttyqtady, dep habarlaıdy QazAqparat tilshisi.
Qyzylsýat orta mektebi osydan eki jyl buryn ashylǵan. Irgeli aýylda bala sany tez ósip keledi. Aýyldaǵy qurylys qarqynyna qarap, munda halyq sanynyń artyp kele jatqanyn baıqaýǵa bolady. Búgin mundaǵy merekeli kúnge QR Aqparat jáne qoǵamdyq damý mınıstri Dáýren Abaev pen Aqmola oblysy ákiminiń orynbasary Marat Iǵalı qatysty.
«Qurmetti ata-analar men ustazdar! Qurmetti oqýshylar! Sizderdi búgingi Bilim kúnimen shyn júrekten quttyqtaımyn! Bilim – bárinen mańyzdy. Oqýshylarǵa shyn júrekten bilimdi bolýdy tileımin. Keler urpaqqa – búldirshinderge densaýlyqtaryńyz myqty bolsyn deımin. Densaýlyqtaryńyz myqty bolsa, sapaly bilim alasyzdar. Egemendi elimizdiń tuǵyryn sizder alyp júresizder dep kámil senemin. Ata-analardy búgingi qýanyshpen quttyqtaı otyryp, kúsh-jiger tileımin. Balalardyń kúndelikti oqýyn alyp júrý ońaı sharýa emes. Ustazdardyń eńbegi zor ekenin bárimiz bilemiz. Bıyl «Pedagogtar mártebesi týraly» zań qabyldanǵaly jatyr. Ol zańnama jalaqyny ǵana emes, ustazdardyń mártebesin ósiredi dep senemin», - dedi Dáýren Abaev.
Mınıstr óz sózinde mekteptegi jyldar áli kúnge deıin esinde ekenin atap ótti.
«Bilim sizderdiń ómirlerińizde úlken mańyzǵa ıe bolary anyq. Áli kúnge deıin bastaýysh synypta, joǵary synypta da synyp jetekshisi bolǵan ustazdarymdy umytpaımyn. Bastaýysh synypta Erkehan Dáýletqyzy, joǵary synypta Gúlnár Ábdirazaqqyzy bizdiń synypqa jetekshilik etti. Búgin alǵan bilimderińiz sizderge ǵana emes, búkil Qazaqstan qoǵamyna paıdasyn tıgizerine senemin», - dep túıdi sózin D.Abaev.
Mekteptegi saltanatty jıynda birinshi synypqa barǵan 37 bala ortaǵa shyǵyp, taqpaq oqyp, kópshiliktiń qurmet-qoshemetine ıe boldy.
«Mektep tolyǵymen tehnıkamen, qajetti jabdyqtarmen jabdyqtalǵan. Bizde mýltımedııalyq jáne aqparattyq kabınetter bar. Balalardyń barlyǵy IT tehnologııalarmen oqyp jatyr. Kabınetterde mýltımedııalyq taqtalar bar. Muǵalimder balalardy jańartylǵan baǵdarlamamen oqytýda», - dedi ol.
Sh. Súıindikova atap ótkendeı, mektep ujymy Qyzylsýat orta mektebine avıasııa general-maıory, Keńes Odaǵynyń eki márte Batyry, «Barys» ordeniniń ıegeri Talǵat Bıgeldınovtyń esimin berý bastamasyn kóterip jatyr.