Premer-Mınıstr Asqar Mamınniń tóraǵalyǵymen ótken Úkimet otyrysynda Memleket basshysynyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» Joldaýyn iske asyrý sharalary talqylandy. Bul týraly primeminister.kz habarlady.
Prezıdenttiń Qazaqstan halqyna Joldaýynyń bes basty baǵytyn oryndaý joldary týraly Premer-Mınıstrdiń birinshi orynbasary – Qarjy mınıstri Á. Smaıylov, Úkimet basshysynyń orynbasarlary J. Qasymbek pen B. Saparbaev baıandady.
QR Premer-Mınıstri Asqar Mamın Memleket basshysynyń Joldaýyn iske asyrýdy tolyǵymen qarjylaı qamtamasyz etý sharalaryn qabyldaý qajettigin aıtty.
«Prezıdent tapsyrmalaryn oryndaýǵa barlyq birinshi basshylar derbes jaýapty ekenin nazarlaryńyzǵa salamyn. Atap aıtaıyn, árbir tapsyrmasynyń oryndalýy qatań baqylaýǵa alynyp, oryndalýynyń naqty merzimi belgilenýi qajet. Biz qoıylǵan mindetterdi tıimdi sheshý boıynsha úılesimdi jumys júrgizýimiz kerek», — dedi Asqar Mamın.
Úkimet basshysy 7 qyrkúıekke deıin Memleket basshysynyń Joldaýynda qoıylǵan mindetterdi iske asyrýdyń Jalpyulttyq josparynyń jobasyn ázirleýdi tapsyrdy.