«Jaıma» baıqaýynyń jeńimpazy

– «Juldyz» bolý aıaq­astynda eken ǵoı! Ettiń nanyn jaıyp, júldeger bolamyn dep oılamappyn. Bul bala jasymnan kórip kele jatqan isim emes pe?! – dep kú­ledi qostanaılyq Aınur Nádirova. Qos­tanaı qalasyndaǵy Dos­tyq úıin­de qyzmet etetin ol jaqyn­da kór­shi Reseıdiń Chelıa­bi oblysyn­daǵy Verh­neýralsk qalasynda ótken qazaq dıasporasynyń «Týǵan jer» festıvaline bar­ǵanda, qyz-kelinshekterdiń «Jaıma» baıqaýyna qatysqan bolatyn. Jıyrma shaqty qaty­sýshylardyń arasynan bar-joǵy on mınýtqa jetpeıtin ýa­qytta Aınur ettiń kóldeı qamyryn qaǵazdaı etip ja­ıyp, oqtaýyn qazylardyń aldyna qoıdy. Onyń jaıǵan nanynyń juqalyǵy sondaı, ja­ıyp tastaǵanda astyndaǵy aq dastarqannyń oıýly bederi kórinip jatty ári nannyń beti jyp-jyltyr boldy.

– Men jaıyp bolǵan soń, bes mınýttan keıin reseılik bir kelinshek aıaqtady. Tipti bir qamyrdy 25-30 mınýt jaıǵandar bar, – deıdi Aınur. Odan keıingi qyz-kelinshekter jaıǵan et nanynyń arasynda tegis emes, sheti qalyńdap, jelbirep ketkeni de boldy.

– Jarysty uıymdastyrý­shylar bizdiń barlyǵymyzǵa un men jumyrt­qany birdeı mólsherde taratty. Nan­nyń tegis, jyltyr ári juqa bolýy tek qamyrdy ıleýińe ǵana emes, oqtaýyńa da baılanys­ty. Men baıqaýǵa qa­tysasyń degen soń, sol Reseıge úıden óz oqtaýymdy alyp bardym. Qyz-kelinshekter meniń oq­taýyma qyzyqty, – deıdi Aınur.

Anasy Aınurdy uzatqanda oqtaý-taqtaıyn qyzynyń jasaýyna qosyp bergen eken. On úsh jyldan beri onymen jas shańyraqtaǵy qansha jaqsylyqtarǵa asylǵan et­tiń nanyn jaıdy. Osyndaı oq­taýdy anasy Aınurdan úl­ken qyzynyń jasaýyna da qosqan eken. Mine, qyzdyń tárbıesi osydan bastalsa kerek-ti.

– Analarymyz, ájelerimiz jalpy ulttyq taǵamdardyń tehnology bol­ǵan ǵoı. Aýyl­da jylqynyń etin kere­met ystaıtyn, keptirgen qur­ty ózgeshe tátti bolatyn, irim­shigine adam toımaıtyn ájelerimiz boldy ǵoı. Jazyl­maǵan qupııalar. Solar­dy kó­rip óskenime qýa­namyn, – deıdi Aınur.

Bir qyzyǵy, baıqaýǵa qa­tys­qan kelinshekter Aınur­dyń ysqan nanyn talasa-tarmasyp surap aldy. Oqtaýyn qaıda jasatqanyn, qaıdan alǵanyn surap, úıirile berdi. Usaq-túıek kóriner áıelderdiń áńgimesi ulttyq dástúrdiń de, ulttyq taǵamnyń da shegesi-aý, shirkin!

QOSTANAI