Qaraǵandy oblystyq ákimdiginde Prezıdent Qasym-Jomart Toqaevtyń Joldaýynda aıtylǵan mindetterdi oryndaý josparyn talqylaǵan aktıv jınalysy ótti.
Jıynda sóz sóılegen óńir basshysy Erlan Qoshanov aldaǵy is-qımyl baǵyttary týraly aıta kelip, memlekettik qyzmetshilerdiń halyqpen jedel baılanysyna, qaýipsizdikti nyǵaıtýǵa, ekonomıkany damytý josparyna basa bas mán berdi.
– Bıylǵy jyly biz Qaraǵandyda biryńǵaı úılestirý ortalyǵyn iske qosamyz. Barlyq kelip túsken ótinishter taldanady jáne olardyń oryndalýy qadaǵalanady. «Bir tereze» qaǵıdaty boıynsha jumys isteıtin Open akimat ortalyq modýliniń biri bolady. Bul bizge halyqtyń suranysyna jedel den qoıýǵa múmkindik beredi. Atalǵan bastamamyzdy máslıhat depýtattary men qoǵamdyq keńester qoldaıdy degen úmittemin. Biraq bizdiń jumysymyzdyń basym baǵyty adamdarmen kózbe-kóz kezdesýler bolýy tıis, ol – eńbek ujymdaryna, aýyldarǵa, aýlalarǵa barý degen sóz, – dedi Erlan Qoshanov.
Sonymen qatar oblys ákimi qaýipsizdik deńgeıin arttyrýǵa sıfrlyq tehnologııalardyń kómektesetinin atap ótti. Qazirgi tańda oblysta bes myńǵa jýyq syrtqy baqylaý kamerasy, 27 jol qozǵalysy erejelerin buzýdy tirkeý júıesi jumys isteıdi. Sondaı-aq «Turǵyn úılerdiń kireberisteri úshin bultty beınebaqylaý» jobasy engizilýde. Azamattardyń quqyqtyq tártip organdarymen qarym-qatynasy yńǵaıly bolýy úshin polısııa bólimshelerinde front-keńseler ashylýda.
Oblys ákimi ınvestısııa tartý jónindegi josparlar týraly da aıtyp ótti. Jaqyn arada jobalar pýly 2 trln teńgege deıin óspekshi. Búgingi kúnge deıin jalpy somasy 1,5 trln teńgege ınvestısııalyq jobalardy júzege asyrýǵa kelisim-sharttar jasalǵan.
Erlan Qoshanov, sonymen qatar, ınklıýzıvti bilim berýdi damytý jóninde tapsyrma berdi. Onyń aıtýynsha, múmkindigi shekteýli balalarǵa arnalǵan taǵy eki ońaltý ortalyǵy, 6 ınklıýzıvti qoldaý kabıneti men túzetý kabıneti ashylady.
Oblys ákiminiń aıtýynsha, bıylǵy jyly jalpyǵa mindetti bilim berý qoryna kópbalaly jáne az qamtylǵan otbasylardan shyqqan oqýshylarǵa kómek kórsetý úshin bıýdjetten 1,4 mlrd teńge bólingen. Aldaǵy ýaqytta bul soma ósedi eken.
Jıynǵa qatysqan kásipkerler, ǵalymdar, mádenıet qaıratkerleri, qoǵamdyq uıymdardyń ókilderi men eriktiler sóz sóıledi. Mysaly «Meniń úıim» daǵdarys ortalyǵynyń negizin qalaýshy Svetlana Garkýsha jeke óz basyna pedofılııa, esirtki taratý, adam saýdasy, turmystyq zorlyq-zombylyq jáne jynystyq sıpattaǵy qylmystar úshin jazany kúsheıtý týraly tapsyrmanyń unaǵanyn aıtty.
– Meniń zorlyq-zombylyqqa ushyraǵan áıelder jáne balalarmen jumys isteý tájirıbem bar. Bizdiń ortalyq kúrdeli jaǵdaıda qalǵan adamdarǵa keshendi qoldaý kórsetedi. О́z baqylaýym boıynsha aıtaıyn: zorlaýshylar kóp jaǵdaıda óz isterine ókinbeıdi jáne jaqyndary men týǵan-týystaryn da aıamaıdy, – dedi ol.
Aktıv jınalysyna qatysýshylar medısınalyq qyzmet kórsetý sapasyn arttyrý, sybaılas jemqorlyqqa qarsy kúres, shaǵyn jáne orta bıznesti, týrızmdi, aýyl sharýashylyǵyn jáne oblystaǵy eriktiler qozǵalysyn damytý máselelerin talqylady.
Qaraǵandy oblysy