О́ıtkeni torap salynatyn mańaıdan súrilýi tıis bazar men avtojanarmaı beketiniń basshylary, telimderin bosatýdan úzildi-kesildi bas tartyp jatyr. Olar memleket muqtajy úshin jerdi satyp alýǵa tólenetin ótemaqyny azsynyp otyr.
Jergilikti bılik telim ıelerimen sottasyp, aýdandyq sot isti memlekettiń paıdasyna sheship bergen bolatyn. Alaıda kásipkerler úkimmen kelispeı, apellıasııalyq shaǵym túsirgen. Sondyqtan sottyń uzaq qaralatyn túri bar. Endi eki jaqty daýdyń kesirinen qurylys taǵy saǵyzsha sozylyp, jurttyń uzyn-sonar kepteliste turýyna týra keledi. Aıta ketsek, Almaty mańyndaǵy jol aıyryqtyń qurylysy 2017 jyldyń sońynda bastalǵan. Mamandardyń esebine súıensek, jol qozǵalysy tyǵyz qalalarda kólik júrgizýshiler jylyna 45 kúnin kepteliste joǵaltady eken. Keptelister ýaqyt pen aqshanyń sory ǵana emes, densaýlyqtyń da jaýy. Aq halattylardyń aıtýynsha, kepteliste jıi, ári uzaq turý ókpe aýrýlarynyń týyndaýyna ákelip soǵady. Onyń ústine, mamandar astma aýrýymen aýyratyndar úshin kepteliste turý tipti qaýipti ekenin eskertedi. Sondaı-aq, júıke júıesi qyzmetiniń buzylýy men stress kepteliste uzaq ýaqyt turýdyń saldarynan bolady. Jol-kólik oqıǵalary, ásirese, keptelisten kóz ashpaıtyn «Altyn Orda» bazary mańynda jıi tirkeledi. Jol birshama keńeıdi, aspaly ótkel salynǵanmen, keptelis kúrdelene túspese, jeńildegen joq. Almaty qalasyna kelip jumys isteıtin Qarasaı, Jambyl aýdandarynyń turǵyndary bar, halqynyń sany eki mıllıonǵa jeteǵabyl Almaty qalasynan arzan azyq-túlik izdep bazarǵa aǵylatyn el bar, saǵattap jyljymaıtyn tyǵynnan talaıdyń júıkesi syr berdi.
«Qazirgi ýaqytta sot sheshimimen berilgen somasymen kelispegen sebepten, 3 avtokólikterge janarmaı quıý stansııalarynyń jer ýchaskeleri memlekettik muqtajy úshin alý boıynsha materıaldary sot organdarynda qaralýda. Ekeýi Almaty oblystyń sotynyń apellıasııalyq alqasynda jáne bireýi QR Joǵarǵy sotynda qaraý barysynda. Sot otyrystary aıaqtalyp, sheshimi shyqqannan keıin tıisti jumystar júrgiziledi», dedi Almaty oblysy Qarasaı aýdany ákimdiginiń bólim basshysy Dúısen Ázderov jýrnalıstermen kezdesken kezde.
Almaty