Memleket basshysy Nursultan Nazarbaev “Qazaqstan” ortalyq konsert zalynda Naýryz meıramyna arnalyp uıymdastyrylǵan merekelik konsertti tamashalap, konsert bastalmas buryn jınalǵan qaýymǵa jáne barsha qazaqstandyqtarǵa arnap merekelik quttyqtaý sóz sóıledi.
“Osydan 19 jyl buryn egemendik almaı turyp, 1991 jyly 15 naýryzda meniń arnaıy Jarlyǵymmen Naýryz meıramy resmı mereke bolyp jarııalanǵany esterińizde bolar. Sonda “Eski jyl esirke, jańa jyl jarylqa” dep tiledik, jańa jylǵa úmit artyp, bolashaqtan jaqsylyq kúttik. Tilegimiz qabyl bolyp, biz sol jyly ata-babamyz ǵasyrlar boıy armandaǵan azattyqqa, kıeli táýelsizdikke qol jetkizdik”, dep atap ótti Elbasy óz sózinde. Tól merekesin zaryǵa kútken halqymen qaıta qaýyshqan Naýryzben birge táýelsizdigimizdiń tamyljyǵan syrly tańy atty. Qazaq eliniń erkin tynystaýy da Naýryzben birge kelgendeı. Endi mine, álemdik saıasatta Qazaqstan shoqtyǵy bıiktegen tusta IýNESKO Naýryz meıramyn adamzat balasynyń mádenı murasy sanatyna qosty. Bıyl Birikken Ulttar Uıymy tarapynan Naýryz merekesi halyqaralyq meıram retinde qabyldandy. Jańarǵan, jasarǵan Naýryz dala men qalaǵa kóktem tynysyn ákeldi.
Alǵash ret sahnasynyń tórine óner maıtalmandaryn Táýelsizdik merekesinde shyǵarǵan “Qazaqstan” ortalyq konsert zalyndaǵy osy jolǵy konserttiń salmaǵy tym qomaqty kórindi. “Naýryz nury” degen ataýmen naǵyz juldyzdar shoǵyryn jınaǵan konserttik baǵdarlamanyń shymyldyǵyn Qurmanǵazy atyndaǵy akademııalyq halyq aspaptary orkestri kúı atasynyń “Serperimen” serpip tastady. Qazaqstannyń eńbek sińirgen qaıratkeri Dúısen Úkibaıdyń dırıjerlyǵymen “Serper” saryny aıaqtalysymen halqynyń qolpashtap, dúr etken shapalaǵyna qaıta-qaıta bas ıgen KSRO Halyq ártisi, QR Memlekettik syılyǵynyń laýreaty Ermek Serkebaev shyqty. “Osydan birneshe jyl buryn Elbasymyzǵa shekara asyp shetelge barǵanymda bir keremet konsert zalynda án shyrqadym, aldymda da, art jaǵymda da, oń jaǵym men sol jaǵymda da jaǵalaı án tyńdaǵan jurt. Sondaı bir ǵajaıyp saraı kórdim, ondaı konsert zaly bizde qashan bolady dep edim. Mine, armandaǵanym óz elimnen tabyldy”, dep qýanǵan maestro eki án shyrqady. Onyń biri – S.Muhamedjanovtyń “Aısulý” operasynan “Serke kavantınasy” bolsa, ekinshisi S.Báıterekovtiń áıgili “Jan dosym” áni.
Sahnaǵa syny ketpegen syrly aıaqtaı, sulý júzine syńǵyrlaǵan úni kelisken KSRO Halyq ártisi, QR Memlekettik syılyǵynyń laýreaty Bıbigúl Tólegenova apamyz shyǵyp, “Gaýhartasty” marjandaı móldiretip tógildirgen sátindegi halyq áserin sózben aıtyp jetkizý múmkin emes. Ony tek dál osy sátte, dál osy zalda otyryp tyńdaǵan jan ǵana sezinetin bolar. Munan soń Úkili Ybyraıdy kóz aldyńa elestetip, sahnaǵa QR Halyq ártisi Qaırat Baıbosynov kóterilgen, al QR Halyq ártisi, QR Memlekettik syılyǵynyń laýreaty Qarshyǵa Ahmedııarov “Elbasy” atty óz shyǵarmasyn oryndady. Halyq aqyndyǵyn tanıtyn Marfýǵa Aıtqojına “Dara tulǵa” atty óleńine án jazypty, ony Qazaqstannyń eńbek sińirgen qaıratkeri Shahmardan Ábilov oryndady. Án asqaq, adam janyna qaırat janıtyndaı ór týyndy eken.
Naýryz nury sahna tórin saltanatqa, qýanyshqa bóledi. Álibek Dinishev, Jánııa Áýbákirova, Ǵafız Esimov, Nurjamal Úsenbaeva, Eskendir Hasanǵalıev, Nurǵalı Núsipjanov, Aıman Musahodjaeva, Naǵıma Esqalıeva syndy qazaq óneriniń jarqyraǵan jaquttary birinen soń biri án shyrqaǵan konsert tamashasy tyńdaǵan jandy án áleminiń aıdynynda terbep syrly áýen sazymen áldıleı berdi, áldıleı berdi. Kóńilderi kóktemdeı, áýen sazynan áserge bólengen halyq “Naýryz nury” konsertinen tynyǵyp, rýhanı túlep qaıtyp jatty.
Anar TО́LEÝHANQYZY.