Qazaqtyń shoıyn judyryq ıesi, Rıo Olımpıadasynyń chempıony Danııar Eleýsinov senbi kúni AQSh-tyń Nıý-Iork qalasyndaǵy áıgili Madison Square Garden arenasynda óziniń kezekti jekpe-jegin ótkizip, qarsylasyn birinshi raýndtyń ózinde-aq nokaýtqa jiberdi. Otandasymyz bul jeńisi arqyly «Eleýsinovtiń joıqyn soqqysy joq, kásipqoı boksta júrgen qatardaǵy qarapaıym boksshy» dep synap júrgen jankúıerlerine naqty jaýap berip, óziniń múmkindigin kórsetti.
Ras, buǵan deıin Danııar Eleýsinov tórt qarsylasyn upaı sanymen, úsh qarsylasyn tehnıkalyq nokaýtpen jeńgen bolatyn. Sondaı-aq barlyq qarsylasy jeńilistiń kermek dámin tatqan, deńgeıi ózinen tómen boksshylar bolatyn. Al bul joly 13 kezdesýdiń 12-sinde jeńiske jetip, tek bir aıqasynda ǵana teń túsken 34 jastaǵy Reshard Hıksti birinshi raýndta sulatyp saldy.
Amerıkalyq boksshy óte tájirıbeli. 12 qarsylasynyń teń jartysyn nokaýtqa túsirgen ákki boksshy. Reshard Hıks Danııarǵa deıingi sońǵy jekpe-jeginde óziniń otandasymen judyryqtasyp, Amerıka boks federasııasynyń beldigin jeńip alǵan-dy. Osyndaı iri jetistiginen keıin ol Eleýsinovpen jekpe-jek ótkizýge kelisim bergen.
10 raýndqa josparlanǵan aıqasta Hıks birinshi soqqy jasap, otandasymyzdy synaqtan ótkizip aldy. Mundaı jaǵdaıǵa daıyn bolǵan otandasymyz birden jekpe-jek tizginin óz qolyna alyp, rıng ortasyn ıelendi. Raýndtyń orta tusynan asqanda Danııar belsendiligin arttyryp, qarsylasyn nokdaýnǵa jiberdi. Amerıkalyq boksshy esin jıyp, jekpe-jekti qaıta jalǵastyrǵanymen otandasymyzdyń serııalyq soqqysynan keıin taǵy da nokdaýnǵa tústi. Bul sátte tóreshi esepti ashpaı-aq, kezdesýdi merziminen buryn aıaqtady. Osylaısha, otandasymyz karerasyndaǵy segizinshi jeńisine qol jetkizdi.
Jekpe-jekten keıin Eleýsinov jerglikti BAQ ókilderine suhbat berip, aldaǵy josparymen bólisti. «Árıne, jeńisime qýanyshtymyn. Etken eńbegimniń, tókken terimniń aqtalǵanyna dán rızamyn. Birinshi raýndta jeńiske jetý barlyq boksshynyń armany. Biraq búgingi aıqas ózimniń kóńilimnen shyqqan joq. Jekpe-jekti qaıta qarap shyǵyp, qatelikterimmen jumys isteıtin bolamyn. Qazir dál myna boksshymen jekpe-jek ótkizgim keledi dep aıta almaımyn. Men reıtıngtik kezdesýler ótkizip júrgendikten, promoýterlerim qaı boksshyny usynady, sol boksshymen judyryqtasa beremin», deıdi Danııar Eleýsinov.
Otandasymyzdyń jarqyn jeńisin álemdik BAQ ókilderi de jarysa jazyp, boks mamandary qazaq oǵlanynyń ónerine joǵary baǵa berip jatyr. Tipti amerıkalyq áıgili The Ring jýrnalynyń jýrnalısi Raıan Songalııa Danııardy Maık Taısonǵa teńedi. «Danııar Eleýsinov sharshy alańǵa Maık Taıson sekildi kóterilip, dál Taısonnyń ádisimen qarsylasyn eki mınýtta sulatyp saldy. Ol osy qarqynynan taımasa, aldaǵy ýaqytta talaı bıikti baǵyndyratynyna senimdimin», dep jazady Songalııa.
Bul jeńisinen keıin Eleýsinov álemdik reıtıngte joǵary kóterilip, 152-orynǵa turaqtady. Jospar boıysha, otandasymyz jyl sońyna deıin taǵy bir jekpe-jek ótkizbek.