Bul týraly Qostanaıda «Qaıyrymdylyq kerýeni» respýblıkalyq konkýrsy týraly jýrnalısterge brıfıng ótkizgen Qostanaı oblysy Isker áıelder qaýymdastyǵynyń ókilderi aıtyp berdi. 2019 jyldyń 2 qyrkúıeginen bastap «Qaıyrymdylyq kerýeni» II respýblıkalyq konkýrsyna ótinimder qabyldaý bastalady. Ony QR Tuńǵysh Prezıdenti – Elbasy Qory, Qazaqstannyń Isker áıelder qaýymdastyǵy, «Habar agenttigi» AQ, «KTK» telearnasy jáne «Oqjetpes» emdeý-saýyqtyrý kesheni uıymdastyryp otyr.
«Ekinshi jyl qatarynan ótkizilip kele jatqan bul konkýrs arqyly Elbasy Qory adamgershilik qundylyqtaryn, qaıyrymdylyq jáne gýmanızm ıdeıalaryn nasıhattaıdy. Biz júregi keń azamattarymyzdy, búgingi kúnniń naǵyz batyrlaryn halyqqa kórsetip, tanystyrǵymyz keledi. «Qaıyrymdylyq kerýeni» jobasy azamattardyń úlken yqylasyna ıe bolǵany qýantady» dedi Qostanaı oblysy Isker áıelder qaýymdastyǵynyń atqarýshy dırektory Balbópe Ertaeva.
Baspasóz konferensııa barysynda konkýrsqa qatysý erejeleri naqtylandy. Oǵan áleýmettik máselelerdi sheshýge úles qosyp júrgen, ózderiniń ıgi isterimen basqalardy yntalandyratyn jeke jáne zańdy tulǵalar qatysa alady.
Qostanaı oblysy Isker áıelder qaýymdastyǵynyń basqarma múshesi, oblystyq máslıhat depýtaty Gúlmıra Qapenova qostanaılyqtardy konkýrsqa qatysýǵa shaqyrdy.
«Qaıyrymdylyq kerýeni» bizdiń elimizde kópshilikke tanymal bola bermeıtin adamdar, batyrlardyń kóp ekenin kórsetedi. Olardyń is-áreketteri barshamyzdy tańdandyra otyryp, mysal bola alady. Eger siz muqtaj adamdarǵa kómektesip, qıyn jaǵdaıda batyldyq tanytyp, paıdaly is-sharany ótkizýge kómektesken bolsańyz, bul saıys siz úshin!» dedi Gúlmıra Qapenova.
Oblysta baıqaýǵa qatysý úshin ótinimderdi qabyldaý 29 qarashaǵa deıin jalǵasatyn bolady.
Qostanaı