Bıyl Almaty oblysyndaǵy qant qyzylshasy egilgen alqaptyń kólemi 14 myń gektarǵa jetti. Bul jınalǵan ónimnen 485 myń tonnaǵa deıin tátti túbir daıyndaýǵa múmkindik beredi. Jalpy, aımaqta tátti túbir tanaptarynyń kólemi 2014 jyldan beri 10 esege kóbeıgen.
Qant qyzylshasy egistiginiń artýy jergilikti jerdegi óńdeý óndirisiniń de órkendeýine qozǵaý saldy. Mysaly, ótken jyly qaıta jańǵyrtýdan ótken eki óndiris oshaǵy – Kóksý jáne Aqsý qant zaýyttary 42 myń tonna taza aq qant óndirdi. Mamandar bul daıyn ónimniń ishki naryqty qamtýǵa jeteǵabyl ekenin aıtýda. Bıyl da Jetisý topyraǵynda ónip, ósken tátti túbirden alynatyn taza qant kólemi kóbeımek. Qazir qant qyzylshasyn qazyp, jınaý naýqany qyzyp tur.
Jaqynda Aqsý qant zaýyty osy jylǵy qant qyzylshasynyń alǵashqy ónimin qabyldaı bastady. Birinshi kúni Aqsý jáne Sarqan aýdandarynyń kásipkerleri kásiporynnyń daıyndaý pýnktine 450 tonnadan astam tátti túbirdi ákeldi. Jaqyn arada Alakól aýdanynyń qyzylsha ósirýshileri ónim jóneltetin bolady.
Aqsý aýdanyndaǵy «Aqmol» servıstik-daıyndaý ortalyǵy da alǵashqy qatarda jınalǵan qyzylshany zaýytqa ótkizdi. Servıstik-daıyndaý ortalyǵy 2018 jyly quryl eken, «Jetisý» áleýmettik korporasııasy arqyly qant qyzylshasynyń elıtalyq tuqymy men aýyl sharýashylyǵy tehnıkasyn alyp, isin ilgerletip otyr. Bıyl qyzylsha alqabyn 70 gektardan 110 gektarǵa deıin ulǵaıtypty.
- Buıyra, ónim mol bolady dep kútip otyrmyz. Qyzylshanyń ortasha ónimdiligi gektaryna 600 sentnerdi qurady. Birinshi kúni biz kásiporynǵa 250 tonna qyzylsha ákeldik. Jalpy bıyl 6 myń tonnadan astam ónim alýdy josparlap otyrmyz, - deıdi «Aqmol» servıstik-daıyndaý ortalyǵy dırektory Berik Tynyshbaev.
Al 2017 jyly ekinshi tynysy ashylyp, qaıta iske qosylǵan Aqsý qant zaýyty ótken eki jyl ishinde 170,3 myń tonna qant qyzylshasyn qabyldap, 13 myń tonna qant ónimin shyǵardy. Osy jyly 200 myń tonna qyzylsha qabyldap, 20 myń tonna taza qant qumyn shyǵarý josparlanýda. «AqsýQant» JShS bas dırektory Samat Nádirbaevtyń aıtýynsha, qant óndirisi qazan aıynda bastalady.
- Bıyl zaýytty jańǵyrtýdyń ekinshi kezeńin aıaqtaımyz. Bul óz kezeginde óndiristi 4 myń tonnaǵa deıin arttyrýǵa múmkindik beredi. Úshinshi kezeń aıaqtalǵannan keıin tolyq óndiristik qýattylyǵyna kóshemiz. Ol kezde kásiporyn táýligine 4,5 myń tonna ónim shyǵara alady, - deıdi Samat Nádirbaev.
Qazir zaýytta 260 adam eńbek etedi, óndiris tolyq kúshine engende jumysshy sany 550 adamǵa deıin artady. Al kásiporynnyń turaqty jumysyn qamtamasyz etý úshin «Jetisý» áleýmettik-kásipkerlik korporasııasy arqyly jalpy quny 4,5 mlrd teńge bolatyn 280 dana jáne 28 túrli qural- jabdyq jıyntyǵy men aýyl sharýashylyǵy tehnıkasy lızıngke berilipti.
- Jalpy óńirde qant qyzylshasyn jańǵyrtý men damytý maqsatynda «Jetisý» áleýmettik-kásipkerlik korporasııasy jaýapkershilik alyp otyr. Bizdiń qoldaýymyzben qyzylsha ósirýshilerdi qoldaý úshin 29 servıstik-daıyndaý ortalyǵy qurylǵan bolatyn. Sharýalarǵa 603 dana aýyl sharýashylyǵy tehnıkasy jáne 60 myń suranysty qamtyǵan daqyl tuqymy berildi. Servıstik-daıyndaý ortalyqtaryn qurý nátıjesinde qant qyzylshasynyń jalpy kólemi 2014-2018 jyl aralyǵyndda 24 myń tonnadan 440 myń tonnaǵa deıin kóbeıdi. Al egistik alańy bıylǵa deıin satylap ósip, 1200 gektardan 14 myń gektarǵa deıin ulǵaıdy, - deıdi«Jetisý» áleýmettik-kásipkerlik korporasııasy agroónerkásip kesheni departamentiniń dırektory Qýanysh Toǵaıbaev.
Almaty oblysy