Qyrǵyzstan men Tájikstan shekarasyndaǵy kıkiljiń qyrkúıektiń 15-de bastalyp, 18-de aıaqtaldy. Alaıda kisi qany tógilip, «Azııa-Plıýs» aqparattyq agenttiginiń habaryna qaraǵanda, bir qyrǵyz, úsh tájik shekarashysy qaza tapqan.
Qyrǵyz-tájik shekarasynyń jalpy uzyndyǵy 976 shaqyrym, sonyń ishinde delımıtasııa men demarkasııadan ótip, bekitilgeni tek 504 shaqyrym ǵana. Demek, bul eki eldiń ortaq shekarasynyń tek jartysy ǵana belgilengen degen sóz. Bul – shekara mańyndaǵy kıkiljińdi, sýǵa, jerge degen talasty únemi týyndatyp turatyn jaǵdaı. Etnosaralyq kıkiljińder de bolyp turady. Keıde ashynǵan halyq bir-birine tas atyp, tipti oq jaýdyryp, jaǵdaıdy qandy tartysqa ulastyryp jiberedi. Myna oqıǵa da sondaıdyń biri bolyp otyr.
Bul jolǵy kıkiljiń Qyrǵyzstannyń Batken oblysy men Tájikstannyń Soǵdı oblysy turǵyndarynyń arasynda 15 qyrkúıekte bastaldy. Batken oblysynyń Láılek aýdanyndaǵy Maqsat shekaralyq beketiniń mańynda tájikter talas aýmaqqa qurylys júrgize bastaǵandyqtan kıkiljiń týdy degendi qyrǵyz jaǵy aıtady. Al tájik jaǵy qurylysty aldymen qyrǵyz jaǵy bastady dep aıyptaıdy.
Qalaı desek te qazir kıkiljińdi naqty qaı jaǵy buryn bastaǵany talas týdyryp tur. Áıteýir eki jaqtyń turǵyndary da óz týlaryn tigip, talas aımaqta qurylys jumystaryn júrgizýdi bastaǵan. Bir-birine qarsy tas atýdan bastalǵan kıkiljiń kelesi kúni atysqa ulasqan.
Eki jaq ta ózderinikin durys, qarsylastaryn arandatýshylar, atysty bastaǵan solar dep aıyptaıdy, biraq naqty kim ekenin anyqtaý qıyn. «Fergana News» basylymy da joǵarydaǵy «Azııa-Presstiń» derekterin qaıtalap, tájik jaǵynan úsh, qyrǵyz jaǵynan bir shekarashynyń qaza bolǵanyn jarııalady. Sonymen qatar osy basylymnyń jarııalaýyna qaraǵanda, qyrǵyz jaǵynan jaralanǵandar sany 13, tájik jaǵynan jaralanǵandar 12 adam bolypty.
Joǵaryda aıtqanymyzdaı, bul eki eldiń shekarasyndaǵy jıi bolyp turatyn shıelenisti oqıǵanyń biri. Osy jyldyń shilde aıynda ǵana qyrǵyzdyń Aqsaı aıylynyń mańynda osyndaı kıkiljiń bolyp, bir adam ólip, 14 adam jaralanǵan.
«Interfaks» agenttiginiń habaryna súıensek, Qyrǵyzstan prezıdenti Sooronbaı Jeenbekov qyrǵyz-tájik shekarasyndaǵy kıkiljińdi halyqaralyq quqyq sheńberinde sheship, tezirek retteý qajettigin málimdegen. Sondaı málimdeme Tájikstannyń ortalyq bıligi tarapynan da jarııalandy.
Osydan on jyldaı buryn Qyrǵyzstan men Tájikstan talas týdyrǵan shekaralyq aýmaqtarǵa qurylys júrgizbeý týraly kelisimge qol qoıǵan. Biraq osy jyldar ishinde eki jaq kelisimdi buzdy dep bir-birin aıyptaýmen keledi.
Bul jolǵy kıkiljiń eki eldiń premer-mınıstrleriniń kelissóz jasaýymen 18 qyrkúıekte sheshildi. Eki el atys jasalǵan jerden qarýly kúshterdi aýlaq áketýge kelisti. Sonymen qatar Qyrǵyzstan jaǵy buryn turǵyzǵan baqylaý munarasyn buzýǵa, al Tájikstan jaǵy qurylys turǵyzbaýǵa kelisti.
Árıne bul túpkilikti sheshim emes, kıkiljińdi retteýdiń bir amaly ǵana. Osyǵan qarap Qazaqstannyń óz shekarasyn túpkilikti bekitip, rettep alǵanyna rıza bolasyń. Árıne ondaıǵa memleketter basshylarynyń saıası erik-jigeri kerek edi, Qyrǵyzstan men Tájikstan lıderleriniń ondaı sheshimge bara almaǵany ókinishti-aq. Sondyqtan talas aýmaqtaǵy shekaralyq kıkiljińder de jalǵasa bereri sózsiz. Ol áli talaı adamnyń ólimine soqtyrýy da múmkin.