Parlament Senatynyń Tóraǵasy Darıǵa Nazarbaeva Soltústik Makedonııa Respýblıkasy Assambleıasynyń tóraǵasy Talat Djaferımen kezdesti. Darıǵa Nazarbaeva óziniń kirispe sózinde Qazaqstan Soltústik Makedonııany mańyzdy saıası áriptes retinde qarastyratynyn jáne eki el arasyndaǵy dıplomatııalyq qatynastar ornaǵan sátten bergi alǵashqy resmı parlamenttik delegasııa saparynyń máni zor ekenin atap ótti, dep habarlady Parlament Senatynyń baspasóz qyzmeti.
Senat basshysy Soltústik Makedonııanyń Eýropalyq ıntegrasııasyndaǵy úlken ilgerileýin erekshe atap óte kelip: «Sizderdi quttyqtaımyz jáne Makedonııamen yntymaqtastyǵymyz jalǵasa beredi ári senimdi dosymyz bolady dep úmittenemiz», – dedi.
Senat Tóraǵasy T.Djaferıdiń sapary eki el arasyndaǵy ózara tıimdi yntymaqtastyqtyń jańa kezeńine aıaq basý bolatynyna senim bildirdi. «Eýrazııa elderi parlamentteri spıkerleriniń keńesi alǵash ret Nur-Sultan qalasynda ótti. Osy kezdesýlerdiń bári Eýrazııa aýmaǵyndaǵy ıntegrasııalyq úderisterde parlamentterdiń róli jyl saıyn ulǵaıyp kele jatqanyn ańǵartady», – dedi Senat basshysy.
Soltústik Makedonııa Respýblıkasy Assambleıasynyń tóraǵasy Talat Djaferı óz tarapynan parlamentaralyq baılanystardy nyǵaıtýǵa múddeli ekenin bildirdi.
T.Djaferıdiń aıtýynsha Soltústik Makedonııa Qazaqstannyń barlyq halyqaralyq bastamalaryna, ásirese BUU men EQYU aıasyndaǵy qyzmetine qoldaý bildiredi. Ol barlyq salalarda, sonyń ishinde týrızm, aýyl sharýashylyǵy, bilim berýde ózara is-qımyl deńgeıin arttyrý úshin ekijaqty qatynastardyń barlyq áleýetin paıdalaný mańyzdy ekenin atap ótti.
Kelissózder aıasynda Soltústik Makedonııa Respýblıkasy Assambleıasynyń Tóraǵasy eki el arasyndaǵy vızasyz tártip máselesin sheshýdi jedeldetýdi ótindi. «Bul saýda-ekonomıka salasyna oń áser etedi», – dedi ol.
Darıǵa Nazarbaeva áriptesiniń sózine qoldaý bildirip, búgingi kúni Qazaqstanda ınvestorlar úshin barlyq jaǵdaı jasalǵanyn jáne bıznes-klımatty damytýdyń berik zańnamalyq bazasy qalyptasqanyn aıtty.