Qostanaıda jazýshy Beıimbet Maılınniń týǵanyna 125 jyl tolýyna oraı ótken merekelik sharalar aıasynda ádebıet pen tarıh salasyndaǵy jas ǵalymdardyń qatysýymen Beıimbet Maılınniń shyǵarmashylyǵy men ómirine arnalǵan jastar konferensııasy ótti.
«Bı-aǵanyń mereı toıyna baılanysty ótip otyrǵan bul shara eshqandaı resmı sıpatta emes, shyǵarmashylyq negizde ótedi, onyń aýdıtorııaǵa qyzyqty bolýy ǵana oılastyryldy. Bizdiń maqsatymyz Beıimbet Maılındi zertteý jáne shyǵarmasyn zerdeleý isinde jańa tolqynnyń atsalysýy, jańa býynnyń kózqarasy, jalpy «Táýelsiz eldiń turǵysynan alǵanda Beıimbet biz úshin kim?» degen suraqqa jaýap izdeý bolatyn» dedi oblystyq mádenıet basqarmasynyń basshysy Erlan Qalmaq.
Konferensııa jas aqyn Abylaı Maýdannyń moderatorlyǵymen ótti. Onda ádebıettanýshy, synshy Lev Gýmılev atyndaǵy ýnıversıtettiń doktoranty Zańǵar Kárimhan, aqyn, ádebıettanýshy, jýrnalıst Aınur Tóleý, Semeı qalasyndaǵy Shákárim atyndaǵy ýnıversıtettiń kafedra meńgerýshisi Erkin Rahmetýllın, jazýshy-dramatýrg, Abaı atyndaǵy pedagogıka ýnıversıtetiniń doktoranty Álibek Baıbol, balalar jazýshysy, ádebıet synshysy, «Daryn» memlekettik syılyǵynyń laýreaty Eldos Toqtarbaıuly Beıimbet shyǵarmashylyǵy men onyń zerttelýi, jazýshy shyǵarmashylyǵynyń ómirsheńdigi, jastarǵa nasıhattalýy jaıynda jan-jaqty áńgime qozǵady. Sonymen qatar olar aýdıtorııadaǵy jastar suraqtaryna da tolyqqandy jaýap berip otyrdy.
«Bizdiń gýmanıtarlyq ǵylymdaǵy ǵalymdardyń basy 80 jastyń ústinde, eń jasynyń ózi elýde. Qoǵamdyq ǵylymnyń qartaıǵany baıqalady. Bizde zertteletin, anyqtaıtyn, aıtylmaǵan dúnıe kóp, aqtańdaqtar da jetkilikti. Olarmen kim aınalysady, kim zertteıdi? О́tken ǵasyrdyń basynda jazba ádebıetimiz qalyptasqan tusta aýyr tragedııalyq-psıhologııalyq úderister oryn aldy. Saıası qýǵyndalǵan, repressııaǵa ushyraǵan jazýshylardyń shyǵarmalary órteldi, sóreden alynyp tastaldy, tıym saldy. Solarydń arasynda Bı-aǵań da bar. Barlyǵy da zertteýdi kútip jatyr, Reseıdiń arhıvterinen qaraý kerek» dedi Eldos Toqtarbaı.
Konferensııada Beıimbet shyǵarmashylyǵyn nasıhattaý, onyń erekshelikteri týraly kóptegen qyzyqty pikirler ortaǵa salyndy. Eki saǵatqa sozylǵan konferensııany qoryta kele, jastar Beıimbet shyǵarmalary máńgilik, olar ýaqyt basqa bolsa da sheberligimen, alynǵan máselesiniń mańyzdylyǵymen halqymyzben birge jasaı bertindigi aıtyldy.
Qostanaı