«Astana» halyqaralyq qarjy ortalyǵy Almaty qalasy ákimdigimen birlesip, «AHQO» halyqaralyq ınvestorlar aptalyǵy aıasynda Almaty qarjy forýmyn ótkizdi. Almaty qalasynyń ákimi Baqytjan Saǵyntaev pen AHQO basqarýshysy Qaırat Kelimbetov qatysqan Almaty qarjy forýmy óz alańynda Almatynyń isker toptaryn jınady.
Aıta ketý kerek, qazir 26 eldiń 250-den astam kompanııasy AHQO qyzmetin paıdalanady. «Astana» halyqaralyq qarjy ortalyǵynyń basqarýshysy Qaırat Kelimbetov olardyń arasynda sapasy men sany jaǵynan ártúrli iri kompanııalar, álemdik kommersııalyq bankter bar ekenin aıtty. Aralarynda jańa tehnologııalardy endi qoldanyp júrgender kezdesedi. «Astana» halyqaralyq qarjy ortalyǵynyń endigi maqsaty - 10 jyl ishinde kompanııalar sanyn 1000-ǵa jetkizýdi josparlap otyr. Qaırat Nematulynyń túsindirýinshe, Qazaqstan ınvestısııalardy óte jaqsy qabyldady, biraq kelesi deńgeıge kóterilip, eki ese tartymdy bolý úshin kóp nárse jasaý kerek.
«Halyqaralyq qarjy ortalyǵy aıasynda, ınvestorlar talabyna jaýap beretin platformanyń birneshe deńgeıi bar. Birinshiden, bul - quqyqtyq alań. TMD elderi arasynda biz jeke quqyqtyń qaǵıdattary men normalaryna negizdelgen jeke kommersııalyq, kelisimsharttyq zańdy qoldanatyn jalǵyz elmiz. Ekinshi baǵyt - rettegish. Biz ózimizdiń retteýshimizdi qurdyq. Bul qarjy ınstıtýttaryn tirkeýge jáne qarjylyq lısenzııa berýge múmkindik beredi. Quqyqtyq ortadan keıin biz usynatyn óte mańyzdy deńgeı - qarjylyq platforma. Sizder amerıkalyq kompanııamen birlesken jańa bırjanyń qurylǵanyn bilesizder. Biz álemdegi ekinshi bırjamyz jáne óz tehnologııamyzdy belsendi túrde taratýdamyz. Bul mańyzdy qadam boldy, óıtkeni kapıtal naryǵyn qaıta bastaý úshin bizge banktik nesıelendirý ǵana emes, sonymen qatar kapıtal naryǵynda qarjylandyrýdyń jańa quraly qajet», - dep tolyqtyrdy Q.Kelimbetov.
Sonymen qatar ol túrli ınvestısııalyq qorlarǵa lısenzııa beriletindigin atap ótti. Jýyrda qazaqstandyq jeke ınvestısııalar qory quryldy. Búgingi tańda jarǵylyq kapıtalda 70 mıllıard teńge bar.
«Búgin biz platformamyzdyń birneshe deńgeıin biriktirgimiz keledi. Ol qarjylyq, zańdyq, tehnologııalyq bólim, bul bizge alǵa jyljý quqyǵyn beredi», - dedi AHQO basqarýshysy.
Aıta ketý kerek, Almatyda AHQO halyqaralyq ınvestorlar aptalyǵy ótip jatyr. Oǵan «Astana» halyqaralyq qarjy ortalyǵy (AHQO), memlekettik organdar, sonymen qatar Almaty qalasynyń isker jáne akademııalyq orta ókilderi qatysýda. Buǵan deıin forým Túrkistanda ótken bolatyn.
Baqytjan Saǵyntaev óziniń quttyqtaý sózinde Almatyda Qazaqstannyń salyq tóleıtin iri kompanııalarynyń úshten biriniń, 30-dan astam transulttyq kompanııanyń, bankterdiń bas ofısteriniń 86%-nyń, birikken kásiporyndar men iri halyqaralyq uıymdardyń 43%-nyń ornalasqanyn atap ótti. Almaty - 36 mıllıard dollar ekonomıkasy bar Orta Azııanyń eń damyǵan megapolısi.
«Biz aldymyzǵa jahandyq qala bolýdyń jáne ómir súrý sapasy ári ekonomıkalyq múmkindikteri jaǵynan 100 megapolıs qataryna ený boıynsha uzaq merzimdi mindetti qoıýdamyz. Almaty halqy qala mańyndaǵylardy qosa eseptegende qazirdiń ózinde úsh mıllıonǵa jaqyndap qaldy, al 2030 jylǵa qaraı bes mıllıonǵa jetýi múmkin», - dedi B.Saǵyntaev.
Ol shet aımaqtardy qala standarttaryna saı damytý jónindegi «Jańa Almaty» úsh jyldyq jospardy júzege asyrý úshin 800 mlrd teńgege jýyq bıýdjet qarjysy men jeke ınvestısııa qajet ekenin, sol arqyly qala bastamalarynyń oryndalýyn jáne almatylyqtardyń turmys jaǵdaılaryn jasqartýdy qamtamasyz etetin salyq túsimin arttyrýǵa bolatynyn aıtty.
Bulardan ózge, Almaty ákimdigi «Astana» halyqaralyq qarjy ortalyǵynda qyzmetin júrgizetin ınvestısııalyq qormen yntymaqtastyqty qalyptastyrýdy josparlaýda. B.Saǵyntaev Úkimetpen birge bıznes júrgizýde ákimshilik kedergilerdi azaıtý, tirkeý prosedýralaryn jeńildetý boıynsha sharalar paketiniń qolǵa alynǵanyn atap ótti.
«Almatyda membıýdjet esebinen ındýstrıaldy aımaqta biregeı ınfraqurylym qalyptasty, sonymen qatar «Innovasııalyq tehnologııalar parki» AEA salyq tóleý jáne basqalary boıynsha jeńildikter qarastyrylǵan», - dedi qala ákimi.
Aıta keterligi, megapolıste bıznesti qoldaýdyń birqatar konsaltıngtik jáne qarjylyq sharasy júzege asýda. Mysaly, Qoldaý kásipkerlikti qoldaý ortalyǵy bızneske bir tereze qaǵıdasy boıynsha memqyzmetter jáne tegin konsaltıngtik qyzmetter kórsetedi. «Almaty Finance» kompanııasy men «Almaty» mıkroqarjylyq uıym shaǵyn jáne orta bıznesti qoldaý úshin 2%-dan 7%-ǵa deıin jeńildetilgen nesıeler beredi.
«Jalpy, biz keler jyldan bastap ShOB qarjylyq qoldaý kólemin úsh ese ulǵaıtýdy josparlaýdamyz, aǵymdaǵy 11,5 mıllıard teńgeden 30 mıllıard teńgege deıin. Odan ári biz sheshim qabyldaý úshin saraptama bazasyna súıene otyryp, onyń ishinde ákimdiktiń sıtýasııalyq ortalyǵy jáne Big Data negizinde qoldaý sharalaryna túzetý engizetin bolamyz», - dep atap ótti megapolıs basshysy.
Ol óziniń sózinde áleýetti ınvestorlar úshin taýarlardy óńdeý jáne qaıta óńdeý, kólik-logıstıka qyzmeti, týrızm salalarynyń perspektıvaly baǵyttar ekenin atap ótti. Osynaý ómirsheń salalarda jańa óndiris ashýǵa zor yqpal etetin kreatıvti ekonomıkaǵa erekshe nazar aýdarǵan jón.
Qazaqstandyq qarjy forýmy – tutynýshylar quqyn qorǵaý, AHQO-nyń bıznes úshin múmkindikter máselelerin talqylaıtyn alań. Forýmnyń maqsaty – AHQO-da júrgiziletin ınvestısııa tartýdyń negizderi jáne bıznes júrgizýdiń sharttary týraly habardar etý, sonymen qatar qarjy qyzmetin tutynýshylardy qorǵaý.
Alqaly sharada AHQO sarapshylary spıker retinde qarjy qyzmetin, qarjy tehnologııasyn, jasyl jáne ıslam oblıagsııasyn shyǵarýdy retteý, baǵaly qaǵazdar naryǵyn ınvestısııalaý, sonymen qatar úzdiksiz kásibı damý týraly tereń maǵlumat berdi. Bul forým spıkerlerdiń ádettegi monology formatynda emes, spıkerler men zalda otyrǵan qonaqtar arasyndaǵy qyzý pikirtalas sıpatynda boldy. Barlyq qatysýshylar máselelerdi sheshý joldary týraly tájirıbe, aqparat jáne jańa málimettermen almasý múmkindigi berildi.
ALMATY