Mańǵystaý arnasyndaǵy «Sóz ben saz» baǵdarlamasynyń 27- konserti, qazaq ádebıetiniń kórnekti ókilderi Ábish Kekilbaevpen Farıza Ońǵarsynovanyń 80 jyldyǵyna oraı uıymdastyrylýda. Bul týraly Mańǵystaý oblysynyń óńirlik kommýnıkasııa qyzmetinen habarlady.
Mańǵystaý aýdanynda ótetin merekelik keshke Qazaqstannyń ár aımaǵynan jınalǵan sazgerlerdiń uly tulǵalarymyzǵa arnap shyǵarǵan ánderi shyrqalatyn bolady.
- Osy ýaqytqa deıin Ábish Kekilbaıuly men Farıza Ońǵarsynovaǵa arnap, arǵy tarıhy otyz jyldan asa, bergisi jas býyn sazgerler án arnaǵan eken. Barlyǵyn jınaqtap bir konsertke syıǵyzyp otyrmyz. Bul jerde Ábish Kekilbaıulynyń shyǵarmalarymen Farıza Ońǵarsynovanyń óleńderine jazylǵan ánder aıtylmaıdy. Olarǵa arnalǵan ánder aıtylady. Negizgi avtorlary elimizdiń 8 oblysynan keledi dep josparlap otyrmyz, - dedi «Sóz ben saz» baǵdarlamasynyń avtory ári júrgizýshisi Berdihan Álmen.
80 jyldyqqa arnalǵan mereıtoıda Jambyl oblysynan «Farıza jan» ániniń avtory, mádenıet salasynyń úzdigi Ábıirbek Tináli, Almaty qalasynan qazaq estradasynyń jaryq juldyzy Roza Álqoja, Qyzylorda oblysynan kompozıtor Jaqsygúl Begmanova, Aqtóbe oblysyna Marǵulan Qulmaǵanbetov jáne mańǵystaýlyq aqyn-sazgerler qatysady dep kútilýde.
Aıta keteıik qazirgi ýaqytta Mańǵystaý, Atyraý, Aqtóbe oblysynda Ábish Kekilbaıuly men Farıza Ońǵarsynova esimi berilgen 6 mektep bar. Shyǵarmashylyq keshtiń ereksheligi – atalǵan úsh oblystan eń úzdik degen oqýshylary kelip, ádebıet alyptarynyń óleńderin naqyshyna keltirip oqıtyn bolady.