Alpys jastyń asqaryna shyqqan qaraǵandylyq qylqalam sheberi Oleg Drozdov óziniń mereıtoıynda ónerdi shyn baǵalaıtyn jerlesterine arnap jeke kórmesin usyndy. Kenshiler astanasyndaǵy beıneleý óneri murajaıynyń tórinen sheberdiń 70-ten asa týyndysy oryn aldy.
– Ekspozısııada etıýdter kóp. Kólemdi týyndylardyń ornyna dál osy janrdaǵy kartınalardy usynýdy jón dep taptym. Jumystardyń kóbi ózimizdiń súıikti qalamyz Qaraǵandy týraly. Degenmen, janrlyq sýretter de jeterlik, – deıdi mereıtoı ıesi.
Jalpy, Oleg Drozdovtyń esimi elimizdegi beıneleý óneri salasynda óte tanymal. Sýretshiniń Venesııa, Sankt-Peterbýrg, Pskov, Astana qalalaryn taqyryp etken serııalyq týyndylary synshylar tarapynan joǵary baǵa alǵan. Degenmen, ol óziniń týǵan qalasy Qaraǵandyny shyǵarmashylyq shabytynyń qaınar kózi sanaıdy.
Bul jaıynda belgili ónertanýshy Natalıa Ivanına bylaı deıdi:
– Eger on jyl buryn Drozdovtyń kartınalarynda Qaraǵandy bizge jastaý, shattyqqa toly, biraq birtúrli bólekteý keıipte kórinse, onyń keıingi týyndylarynda qalanyń bolmysy qarapaıym tartqanymen adamǵa jaqyndaı túskendeı áser beredi... Ol gıtarada tamasha oınaıdy. Sodan da bolar, onyń eńbekterinde mýzyka men kórkem sýret bite qaınasyp, obrazdardarǵa jan bitirip turady.
«Qaraǵandyny shyǵarmashylyǵyna arqaý etetin sýretshiler kóp. Alaıda olardyń bári de kenshiler astanasynyń portretin dál Drozdovtaı jan-jaqty ashyp kórsete almaıdy». Bul – maıtalman mamandar tarapynan dara talant ıesi Oleg Drozdovtyń shyǵarmashylyǵyna berilgen joǵary baǵa.
Qaraǵandyny qylqalamnyń qudiretimen totydaı túrlentken sýretshiniń kórmesi qazan aıynyń 22-sine deıin jalǵasady.