Mańǵystaýda Sybaılas jemqorlyqqa qarsy is-qımyl agenttiginiń ókili Arman Berdalın jáne Respýblıkalyq arnaıy monıtorıng tobynyń múshesi, Qazaqstan Respýblıkasy Prezıdentiniń «Altyn sapa» syılyǵynyń, «Qurmet» ordeniniń ıegeri, Reseı memleketinde eń alǵashqy Reseı etno koýorkıngin ashqan etno dızaıner Yrza Tursynzadanyń kelýine oraı, oblys ákimdiginde kezdesý uıymdastyryldy.
Sharaǵa oblys ákimi S.Trumov, oblys ákimi orynbasarlary Q.Jumashev jáne Á. Qyraýbaev, Qazaqstan Respýblıkasynyń Sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti basshysynyń birinshi orynbasary S.Qanybekov qatyssa, óńirdegi qala, aýdan ákimdikteri beınekonfrensııa baılanysy arqyly qatysty.
Aımaq basshysy Prezıdenttiń 2019 jylǵy 2 qyrkúıektegi «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynyń basym baǵyttaryn iske asyrý maqsatynda atqarylyp jatqan jumystar barysymen tanystyryp ótti.
О́z sózinde Arman Berdalın ortalyq deńgeıde qolǵa alynǵan jobalarǵa jáne jyl basynan beri respýblıka boıynsha sybaılas jemqorlyq derekter boıynsha statıstıkalyq málimetterge toqtalyp, sybaılas jemqorlyqqa qarsy is-qımyldy tıimdi júrgizý úshin, qoǵamda sybaılas jemqorlyqqa qarsy mádenıetti qalyptastyrýdyń mańyzdylyǵyna toqtalyp ótti.
Respýblıkalyq arnaıy monıtorıngtik tobynyń múshesi Yrza Tursynzadanyń pikirinshe, ult bolyp uıysýdyń basty tetigi - rýhanı tárbıe, ıaǵnı adamzattyń boıynda adamgershilik, ádildik, adaldyq, parasattylyq sııaqty qasıetterdi qalyptastyrý. Sonda ǵana sybaılas jemqorlyq sııaqty teris qubylystyń qoǵam ómirinde joly kesiledi.
Kezdesý sońynda oblys ákimi Serikbaı Trumov barsha memlekettik qyzmetshilerdi ádil bolýǵa shaqyryp, ár qyzmetshi ózgeristi ózinen bastaý kerektigin aıtyp ótti.