«Mamandandyrylǵan balalar úıinde» erekshe kútimdi qajet etetin balalar men olardyń ata-analaryna kómek kórsetý maqsatynda «Botaqan» jáne «Kúnim» ońaltý-saýyqtyrý toptary ashyldy. Bul týraly Nur-Sultan qalasy ákimdiginiń baspasóz qyzmeti habarlady.
Búgin Nur-Sultan qalasy ákiminiń orynbasary Baqtııar Mákenniń qatysýmen atalǵan ońaltý ortalyǵynyń ashylý saltanaty ótti.
«Memleket basshysynyń Joldaýynda erekshe kútimdi qajet etetin jáne qıyn turmystyq jaǵdaıynda qalǵan otbasylarda tárbıelenip jatqan balalarǵa erekshe nazar aýdarý týraly aıtylǵan. Biz qalalyq ákimdiktiń Qoǵamdyq densaýlyq saqtaý basqarmasy jáne «Nur Otan» partııasynyń qoldaýymen búgin 2 ońaltý ortalyǵyn ashyp otyrmyz», - dedi Mamandandyrylǵan balalar úıiniń dırektory Sáýle Kenjebaeva. Ortalyqta jańadan ashylǵan «Kúnim» tobyna sal aýrýy, Daýn sındromy jáne taǵy da basqa aýrýlar anyqtalǵan balalar qabyldanady. Olarǵa reabılıtolog, nevropatolog, pedıatr, logoped jáne psıholog mamandary kómek kórsetedi.
Sonymen qatar basseın bar. Al «Botaqan» deni saý, biraq túrli qıyn jaǵdaılarǵa tap bolǵan balalar úshin ashyldy.
Aıta keteıik, ońaltý-saýyqtyrý ortalyqtaryna 1 jastan 4 jasqa deıingi balalarǵa tegin qyzmet kórsetiledi. Ár topqa 15 búldirshin qabyldanady. «Balasyn jalǵyz tárbıelep jatqan ákeler, kóp balaly analar bar. Biz balalar úıiniń qyzmetkerleri retinde osyndaı jandarǵa kómekteskimiz keledi», - dedi Kenjebaeva.