2019 jylǵy 16 qazan - Syrtqy ister mınıstrliginde Qazaqstannyń Syrtqy ister mınıstri Muhtar Tileýberdi, Koreıa Respýblıkasynyń - Kan Gen Hva, Qyrǵyzstannyń - Chıngız Aıdarbekov, Tájikstanniń - Sırodjıddın Mýhrıddın men О́zbekstannyń - Abdýlazız Kamılovtyń qatysýymen «Ortalyq Azııa-Koreıa Respýblıkasy» forýmynyń (OAKR) 12-shi otyrysy ótti. Túrikmen tarapynan osy eldiń Qazaqstandaǵy Elshisi Toıly Komekov qatysty. Bul týraly Syrtqy ister mınıstrliginiń baspasóz qyzmeti habarlady.
Forým otyrysyn ashqan Mınıstr M.Tileýberdi atap ótkendeı, «Qazaqstannyń Tuńǵysh Prezıdenti - Elbasy Nursultan Nazarbaev pen Qazaqstan Prezıdenti Qasym-Jomart Toqaev aımaq elderimen baýyrlas tatý kórshilik qarym-qatynastardy nyǵaıtýǵa erekshe kóńil bóledi. Sondaı-aq OAKR sheńberindegi dıalog atalǵan úderiske tolyǵymen yqpal etedi».
Qazaqstannyń syrtqy saıası vedomstvosynyń basshysy forým alańy Ortalyq Azııanyń Koreıa Respýblıkasymen qarym-qatynasyn jáne aımaqtyq ózara is-qımyldy nyǵaıtýdyń tıimdi tetigine aınalatynyn atap ótti.
Forým aıasynda memlekettik organdar, ulttyq kompanııalar jáne qatysýshy elderdiń sarapshylar qaýymdastyǵy ókilderiniń qatysýymen tórt paneldik sessııasy ótip, onyń barysynda sý resýrstaryn basqarý, tehnıkalyq standarttaý, «jasyl» energetıka jáne aqparattyq tehnologııalar salalaryndaǵy Ortalyq Azııa elderi men Koreıa Respýblıkasynyń yntymaqtastyǵyn damytý perspektıvalary talqylandy.
Paneldik sessııaǵa qatysýshylar Koreıa Respýblıkasynyń ozyq tájirıbesin qoldana otyryp, osy salalardaǵy birlesken jobalardy iske asyrýǵa qyzyǵýshylyq tanytty.
Sondaı-aq eki eldiń isker toptary ókilderiniń qatysýymen sý sharýashylyǵy salasyndaǵy yntymaqtastyq boıynsha Qazaqstan-Koreıa bıznes-konsýltasııalary ótti.
Is-shara nátıjesinde Syrtqy ister mınıstrleri Ortalyq Azııa elderi men Koreıa Respýblıkasy arasyndaǵy ózara tıimdi yntymaqtastyqty odan ári tereńdetýge yqpal etý nıetin rastady.
Forým Hatshylyǵynyń 2020 jylǵa arnalǵan jumys jospary maquldanyp, oǵan kólik jáne logıstıka, densaýlyq saqtaý, bilim berý, mádenıet jáne týrızm salalaryndaǵy yntymaqtastyq jobalary kirdi.
«Ortalyq Azııa – Koreıa Respýblıkasy» forýmy 2007 jyly Koreıa Respýblıkasynyń bastamasymen qurylǵan. Onyń qyzmetiniń negizgi baǵyttary energetıka jáne mıneraldyq resýrstar, qurylys, kólik jáne aqparattyq-telekommýnıkasııalyq tehnologııalar, mádenıet jáne bilim salalaryndaǵy yntymaqtastyqty nyǵaıtý bolyp tabylady.