Aldaǵy beısenbi kúni, ıaǵnı 24 qazanda álemdik tennıs sportynyń juldyzdary serbııalyq Novak Djokovıch pen ıspanııalyq Rafael Nadal Nur-Sultandaǵy «Barys-Arena» sport saraıynda qaıyrymdylyq kezdesýin ótkizedi.
Elorda tórindegi ǵalamat kezdesý Qazaqstan tennıs federasııasynyń prezıdenti Bolat О́temuratovtyń muryndyq bolýymen jáne Nur-Sultan qalasy ákimdiginiń qoldaýymen uıymdastyrylyp jatyr. Atalǵan is-sharanyń negizgi maqsaty – elimizde tennıs sportynyń tanymaldyǵyn arttyrý jáne jas órenderdi osy sportqa baýlý. Sondaı-aq bıletten túsken qarjy balalarǵa arnalǵan ınklıýzıvti alańdar salýǵa jáne oblystardaǵy aýdan ortalyqtarynda tennıs sportyn damytýǵa jumsalady.
2015 jyly paıdalanýǵa berilgen «Barys Arena» muzaıdyn keshenine 11 626 kórermen erkin sııady. Qazaqstan tennıs federasııasynyń vıse-prezıdenti, Qazaqstan qurama komandasynyń kapıtany Dıas Dosqaraevtyń sózinshe, qazirgi tańda Djokovıch pen Nadal matchyna 8 myńnan asa bılet satylǵan. Aıta ketý kerek, kezdesýdiń jeńildetilgen tarıftegi arzan bıletteri satylymǵa shyǵarylǵan aptanyń alǵashqy kúnderinde-aq satylyp ketken. Al qymbat tarıftegi bıletter áli satylymda.
Qazirgi tańda elimizde tennıs sporty aıtarlyqtaı deńgeıde damyp keledi. Barlyq oblys ortalyqtary men qalalarda atalǵan sport túrimen shuǵyldaný úshin sport keshenderi men tennıs korttary salynǵan. Osyndaı qoldaýdyń arqasynda qazir qazaqstandyq tennısshiler halyqaralyq týrnırlerde jaqsy nátıje kórsetip, joǵary jetistikterge qol jetkizip jetip júr. Sondaı-aq Qazaqstannyń erler jáne qyzdar quramasy jyl saıyn tennısten beıresmı álem chempıonaty sanalatyn Devıs kýbogy men Federasııa kýbogynda sátti óner kórsetýde. Taǵy bir aıta keterligi, jýyrda ǵana Qazaqstan tennıs federasııasynyń prezıdenti Bolat О́temuratov Halyqaralyq tennıs federasııasynyń (ITF) vıse-prezıdenti bolyp qaıta saılandy. О́temuratovtyń vıse-prezıdenttikke qaıta saılanýy – qazaq tennısiniń halyqaralyq arenada bedeli joǵary ekenin aıqyndaı túsedi.
Sonymen Djokovıch pen Nadal matchyna oralsaq. Eki tennısshi de Qazaqstanǵa 24 qazan kúni tańerteń keledi. Qonaqúıge jaıǵasyp, azdap tynyǵyp alǵannan keıin olar qalanyń kórikti jerlerin aralaıdy. Atap aıtar bolsaq, serbııalyq pen ıspanııalyq sańlaq «Áziret Sultan» meshitin, Táýelsizdik saraıyn, Haileybury Astana brıtanııalyq mektebin, Nazarbaev Ýnıversıtetin, Ulttyq tennıs ortalyǵyn, «Astana Opera» Memlekettik opera jáne balet teatry men «Báıterek» monýmentin tamashalaıdy. Sonymen qatar jarys bolatyn kúni eki tennısshi Qazaqstandyq BAQ ókilderine arnalǵan arnaıy baspasóz máslıhatyna qatysady.
Qazirgi tańda Djokovıch pen Nadal álemdik reıtıngte alǵashqy eki oryndy bólisip tur. Qos tennısshi basqa týrnırlerdi aıtpaǵannyń ózinde «Úlken dýlyǵa» sanatyndaǵy (Aýstralııa ashyq chempıonaty, Fransııa ashyq chempıonaty, AQSh ashyq chempıonaty jáne Ýımbldon) týrnırlerde 34 márte top jarǵan. Sondyqtan qazirgi tennıs juldyzdarynyń kezdesýine tek qazaqstandyqtar ǵana emes, sheteldik jankúıerler de erekshe qyzyǵýshylyq tanytyp otyr. Sondaı-aq Djokovıch pen Nadal elordamyzda jeke kezdesý boıynsha mereıtoıly 55-shi matchyn ótkizedi. Bul da statıstıka súıetin jankúıerler úshin qyzyqty ári tarıhı oqıǵa bolmaq.
Nur-Sultandaǵy qaıyrymdylyq matchynda Novak Djokovıch resmı túrde álemniń birinshi raketkasy retinde kortqa shyǵady. Al osy kezdesýden keıin Rafael Nadal álemniń birinshi raketkasy ataǵyn ózine qaıtaryp alady. Sebebi osydan birer apta buryn Novak Shanhaıda ótken «Masters» týrnıriniń tórttik fınalynda grek Stefanos Sısıpaschýdan jeńilip, byltyrǵy tıtýlyn qorǵaı almady. Osylaısha Djokovıch ATR reıtıngindegi alǵashqy ornynan aıyrylyp qaldy. Tennısshilerdiń kelesi álemdik reıtıngi resmı túrde 4 qarasha kúni jańarady. Sol kúni Djokovıchten byltyr Parıjdegi «Masters» básekesiniń qorytyndy týrnırinde ıelengen 1600 upaıyn alyp tastaıdy. Al bıylǵy «Úlken dýlyǵa» men «Masters» týrnıriniń eki birdeı jarysynda top jarǵan Rafael Nadal álemniń birinshi raketkasy atanady.
Joǵaryda eki tennısshi Nur-Sultanda jeke kezdesý boıynsha 55-shi matchyn ótkizedi dep aıtyp qaldyq qoı. Sol 55 matchtyń 28-inde Novak Djokovıch jeńiske jetse, 26 kezdesýde Rafael Nadaldiń mereıi ústem bolǵan. Tennısshilerdiń korttaǵy alǵashqy teke-tiresi 2006 jyly bastalǵan. Dál sol jyly Djokovıch pen Nadal «Rolan Garros» (Fransııa ashyq chempıonaty) týrnıriniń fınalynda jolyǵyp, ıspanııalyq tennısshi eki sette 4:6, 4:6 esebimen jeńiske jetken. Al qos tennısshi ázirge sońǵy ret Italııadaǵy Internazionali BNL d'Italia jarysynyń fınalynda kezdesken. Bul match ta Nadaldiń jeńisimen aıaqtalǵan.
Elordada ótetin eki tennısshi arasyndaǵy 55-shi kezdesýde kim jeńedi eken? Bul suraqtyń jaýabyn 24 qazanda biletin bolamyz.