Qazaqstan Respýblıkasy Parlamenti Senatynyń Tóraǵasynyń orynbasary Bektas Beknazarov elimizdiń Joǵary Sot Keńesi uıymdastyrǵan «Sot júıesindegi kadr saıasatynyń bolashaǵy» taqyryby boıynsha halyqaralyq dóńgelek ústelge qatysty. Bul týraly Parlament Senatynyń baspasóz qyzmeti habarlady.
B.Beknazarov sot júıesin jańǵyrtý jáne sot kadrlaryn jańartý jónindegi zańnamalyq aktilerdi jetildirý máseleleri Senat otyrysynyń kún tártibine birneshe márte qoıylǵanyn atap ótti.
2019 jylǵy 21 aqpannan bastap «Qazaqstan Respýblıkasynyń sot júıesi men sýdıalarynyń mártebesi týraly» Konstıtýsııalyq zańyǵa ózgerister men tolyqtyrýlar engizý týraly» Konstıtýsııalyq zań jáne «Qazaqstan Respýblıkasynyń keıbir zańnamalyq aktilerine sot júıesin jańǵyrtý máseleleri boıynsha ózgerister men tolyqtyrýlar engizý týraly» zań kúshine endi.
«Bul zańdar sýdıalardyń táýelsizdigi qaǵıdasyn odan ári nyǵaıtýǵa, ony júzege asyrýdyń quqyqtyq, uıymdastyrýshylyq jáne materıaldyq-qarjylyq kepildikterin nyǵaıtýǵa baǵyttalǵan», - dedi Senat Tóraǵasynyń orynbasary.
Ol túzetýlerdiń edáýir bóligin Senat «Qazaqstan Respýblıkasynyń Joǵary Sot Keńesi týraly» zańǵa engizip, osy memlekettik organnyń sýdıa kadrlaryn taǵaıyndaý men bosatýǵa usyný úshin irikteý quzyretin aıtarlyqtaı keńeıtetinin habarlady.
«Qazaqstan Respýblıkasy Parlamentiniń jańa sessııasynyń ashylýynda elimizdiń Prezıdenti Qasym-Jomart Toqaev sýdıanyń zań men ishki nanym-senimin negizge ala otyryp, sheshim shyǵarý quqyǵy myzǵymas bolyp qala beretinin atap ótti. Bul is júzinde sýdıalarǵa eshkimge alańdamaı jumys isteýge jáne sot qabyldaǵan sheshimderdiń zańdylyǵy men negizdiligine jaýapty bolýǵa senimdilik týǵyzady», - dep atap ótti B.Beknazarov.
Senat Tóraǵasynyń orynbasary oń nátıjelerge qaramastan, sot isin júrgizý deńgeıi zamanaýı quqyqtyq memlekettiń sapalyq kórsetkishteri men mindetterine jete almaı otyrǵanyn atap ótti. Oǵan sot júıesindegi ózekti máseleler sebep bolyp otyr, olardyń kópshiligi sýdıa kadrlaryna qatysty.
B.Beknazarov kadr saıasatynyń keleshegine qatysty búgingi talqylaý osy problemalardy sheshýdiń durys joldary men ádisterin kórsetetinine senim bildirdi.