Jampoz jyraý Murat Móńkeuly men qazaqtyń tuńǵysh bard aqyny Tabyldy Dosymovtyń eskertkishteri ashyldy.
Atyraý oblysy Inder aýdanynyń ortalyǵynda eki birdeı sóz súleıine arnalǵan qurmet - Elbasynyń "Uly dalanyń jeti qyry" baǵdarlamalyq maqalasy aıasynda múmkin bolyp otyr.
"Sóılemesem kim biler, Qyzyl tildiń jorǵasyn",-dep jyrlaǵan aıtysker aqyn, áıgili jyraý Murat Móńkeulynyń máńgilik mekeni - Inder aýdanynyń Jarsýat aýyly mańynda. Zamana syryn tolǵaǵan aqyn eskertkishiniń avtory - Sýretshiler Odaǵynyń múshesi Jaqyp Quttybek. Eskertkishti ashý qurmeti Jazýshylar Odaǵy basqarma tóraǵasynyń orynbasary Mereke Qulkenov pen Murat aqyn urpaǵy Kóshkinbaı Estaevqa berildi.
"Máńgi baqı mekenimdi tabý úshin Denderden, men de bir kún keter me ekem baquldasyp sendermen",-dep qazaqqa tańsyq gıtara aspabyn jyraýlyq ónermen sheber shendestirgen bard aqyn Tabyldy Dosymovtyń ómirden ozǵanyna da bıyl 9 jyl. Bar ǵumyryn týǵan jeriniń mádenıeti men rýhanııatyna arnaǵan aqynnyń Denderi daryndy ulyn eske aldy. Taza qoladan quıylǵan belgili aqyn, biregeı kompozıtordyń eskertkishi - Sýretshiler Odaǵynyń múshesi Baqytbek Muhametjanovtyń jumysy. Aqynnyń dostary Arman Sqabyluly men Talǵat Qaıyrjanov eskertkishtiń lentasyn qıdy.Eńbek sińirgen qaıratker, belgili aqyn Svetqalı Nurjannyń tolǵana aıtqan sózine tebirenbegen jan bolmady.
-Týǵan jerdiń talantty perzentterin ulyqtaý arqyly óskeleń urpaqty otansúıgishtikke tárbıeleýdiń mańyzy zor. Bul eki eskertkish te halyqtyń oıynda júrgen, kópten kútken dúnıe edi,-dedi saltanatty sharaǵa qatysqan oblys ákiminiń birinshi orynbasary Serik Shapkenov.
Denderdegi rýhanııat merekesine elimizge belgili óner qaıratkerleri, aımaqtaǵy zııaly qaýym ókilderi, Parlament depýtattary, jalpy jurtshylyq jınaldy.